कंत्राटदार संतोष पाटील आत्महत्याप्रकरणी उडपी पोलिसांनी पुन्हा एकदा बेळगावकडे मोर्चा वळवला असून हिंडलगा ग्रामपंचायत अध्यक्ष नागेश मंन्नोळकर यांचा मोबाईल जप्त करून चौकशी चालविली आहे.
कंत्राटदार संतोष पाटील आत्महत्याप्रकरणी उडपी पोलीस अधिकाऱ्यांच्या तपास पथकाने हिंडलगा ग्रामपंचायत अध्यक्ष नागेश मन्नोळकर यांचा मोबाईल तपासासाठी ताब्यात घेतला आहे. त्यातून मिळालेल्या माहितीनुसार मन्नोळकर यांनी संतोष पाटील यांच्या घराची जनरल पॉवर ऑफ ॲटर्नी घेतल्याचे स्पष्ट झाले आहे. त्या अनुषंगाने तपास अधिकाऱ्यांनी जीपीए का घेतली? त्यासाठी संतोष पाटील यांना किती पैसे दिले? आदी प्रश्न उपस्थित करून तपासाला गती दिली आहे.
माजी मंत्री के. एस. ईश्वरप्पा यांच्या नावे चिठ्ठी लिहून आत्महत्या करणारे कंत्राटदार संतोष पाटील हे मूळचे बडस के. एच. (ता. बेळगाव) या गावचे रहिवासी होते. सध्या हिंडलगा परिसरात आपल्या कुटुंबीयांसमवेत ते वास्तव्यास होते.
येथील रस्त्यांची कामे व्हावीत यासाठी मी आणि कंत्राटदार संतोष पाटील यांनी दोन वेळा बेंगलोर येथे मंत्री के. एस. ईश्वरप्पा यांची भेट घेतली होती, अशी माहिती हिंडलगा ग्रामपंचायत अध्यक्ष नागेश मन्नोळकर यांनी पत्रकारांना दिली. त्याचप्रमाणे 2021 आली हिंडलगा श्री महालक्ष्मी यात्रेप्रसंगी कंत्राटदार संतोष पाटील यांनी 4 कोटी रुपयांची 108 विकास कामे केली असल्याचेही त्यांनी स्पष्ट केले.
गेल्या वर्षी 2021 मध्ये हिंडलगा येथील श्री महालक्ष्मी यात्रा झाली. या यात्रेपूर्वी गावातील रस्त्यांच्या विकास कामांचे 4 कोटी रुपयांचे बिल मंजूर करण्यासाठी तत्कालीन ग्रामविकास व पंचायत राज्य मंत्री के. एस. ईश्वरप्पा यांनी 40 टक्के कमिशन मागितल्याचा आरोप आहे. कंत्राटदार संतोष पाटील हे सर्वसामान्य कुटुंबातील असून मंत्र्यांच्या सूचनेनुसार त्यांनी कामे केली. केलेल्या कामाच्या मोबदल्यात मंत्री ईश्वरप्पा यांनी बिलातील 40 टक्के रक्कम मागितल्याचे मयत संतोष यांच्या पत्नीने सांगितले आहे.
