बेळगाव शहरातील गजाननराव भातकांडे इंग्रजी माध्यम शाळेमध्ये 2022 -23 सालच्या जूनियर के.जी. शैक्षणिक वर्षासाठी मराठा समाजातील पितृछत्र हरपलेल्या गरजू 10 विद्यार्थ्यांना मोफत प्रवेश देण्यात येणार असून याचा लाभ घेण्याचे आवाहन करण्यात आले आहे.
सध्याच्या परिस्थितीत असंख्य विद्यार्थ्यांना शालेय प्रवेश घेण्यास आर्थिक अडचणींना सामोरे जावे लागत आहे. आर्थिक अडचणींमुळे असंख्य विद्यार्थी शिक्षणापासून वंचित राहत आहेत.
ही बाब निदर्शनास आल्यामुळे संबंधित मुलांना चांगल्या दर्जाचे शिक्षण उपलब्ध करून देण्याच्या उद्देशाने गजाननराव भातकांडे इंग्लिश मीडियम हायस्कूलचे अध्यक्ष मिलिंद भातकांडे यांनी स्वतःच्या शाळेच्या माध्यमातून गरीब गरजू मुलांसाठी काहीतरी हितावह करण्याचा निर्णय घेतला. त्यानुसार गेल्या 12 वर्षापासून बहुजन समाजातील गरीब विद्यार्थ्यांना गजाननराव भातकांडे हायस्कूल शाळेत मोफत प्रवेश देण्याचा उपक्रम राबविला जात आहे.
सदर उपक्रमांतर्गत आजवर शेकडो विद्यार्थ्यांना मोफत प्रवेश व शैक्षणिक शुल्कामध्ये सवलत देण्यात आली आहे. यामुळे संबंधित विद्यार्थी आत्मविश्वासाने शिक्षणात रस घेऊ लागले आहेत. सामाजिक आणि कौटुंबिक आधार नसलेल्या महिला, विधवा यांच्यासह अतिशय गरीब कुटुंबातील मुलांना गजाननराव भातकांडे शैक्षणिक संस्थेतर्फे विशेष सहकार्य केले जात आहे.
त्या अनुषंगाने 2022 -23 सालसाठी जूनियर के.जी. वर्षांमध्ये मराठा समाजातील पितृछत्र हरपलेल्या गरजू 10 विद्यार्थ्यांना मोफत प्रवेश देण्यात येणार आहे. प्रवेश घेण्याची अंतिम तारीख रविवार दि. 8 मे 2022 पर्यंत आहे. तरी इच्छुकांनी अधिक माहितीसाठी भातकांडे शाळेच्या कार्यालयामध्ये संपर्क साधावा, असे आवाहन संस्थेचे अध्यक्ष मिलिंद भातकांडे यांनी केले आहे.
