बेळगाव शहरातील खडक गल्ली येथील श्री युवक मंडळातर्फे येत्या बुधवार दि. 22 मार्च ते रविवार दि. 3 एप्रिल 2022 या कालावधीमध्ये भव्य बक्षीस रकमेच्या दुसऱ्या मोसमातील ‘श्री चषक -2022’ अखिल भारतीय खुल्या टेनिसबॉल क्रिकेट स्पर्धेचे आयोजन करण्यात आले आहे.
टिळकवाडी येथील व्हॅक्सिन डेपो मैदानावर सदर क्रिकेट स्पर्धा खेळविली जाणार आहे या स्पर्धेतील विजेत्या संघास 1,55,555 रुपये आणि उपविजेत्या संघास 77,777 रुपयांचे पारितोषिक दिले जाणार आहे. या अखिल भारतीय पातळीवरील क्रिकेट स्पर्धेचे उद्घाटन बुधवारी 22 मार्च रोजी होणार असले तरी प्रत्यक्ष स्पर्धेला 24 मार्च पासून प्रारंभ होणार आहे. उद्घाटनानंतर पहिले दोन दिवस पत्रकार, वकील, पोस्टमन, आर्मी, लोकमान्य महामंडळ आदी संघांमधील प्रदर्शनीय सामने खेळविले जाणार आहेत.
श्री युवक मंडळ खडक गल्लीतर्फे मागील वर्षी पहिल्या मोसमात बेळगाव जिल्हा स्तरीय टेनिस बॉल क्रिकेट स्पर्धेचे आयोजन करण्यात आले होते. आता यंदा दुसऱ्या मोसमात राष्ट्रीय स्तरावरील खुल्या टेनिस बॉल क्रिकेट स्पर्धेचे आयोजन करण्यात आले असून या स्पर्धेत देशभरातील मातब्बर संघ सहभागी होणार आहेत.
आतापर्यंत मुंबई, हुबळी, जम्मू आदी ठिकाणच्या क्रिकेट संघांनी स्पर्धेतील आपला प्रवेश निश्चित केला आहे. सदर स्पर्धेत नांव नोंदविण्याची अंतिम तारीख शुक्रवार दि. 18 मार्च ही असून स्पर्धेत भाग घेऊ इच्छिणाऱ्या संघांनी अधिक माहितीसाठी विनायक चव्हाण (मो. क्र. 7411424243), प्रसाद शिरवळकर (9731895083) किंवा विश्वजीत चौगुले (9740102498) यांच्याशी संपर्क साधावा, असे आवाहन आयोजकांतर्फे करण्यात आले आहे.
