बेळगावातील रहदारीचा ताण कमी करण्यासाठी शहरासभोवतालच्या चारही बाजूला 69 कि. मी. अंतराचा रिंग रोड तयार करण्यासाठी शेकडो एकर सुपीक शेत जमिनीचे भूसंपादन केले जाणार आहे. मात्र यामुळे शेतकऱ्यांचे मोठे नुकसान होऊन त्यांच्या उपजीविकेचा प्रश्न निर्माण होण्याबरोबरच देशोधडीला लागणार आहेत त्यामुळे या जमिनी वाचवण्यासाठी शेतकऱ्यांचा लढा उभा करणार असल्याचे मत तालुका महाराष्ट्र एकीकरण समितीचे कार्याध्यक्ष माजी आमदार मनोहर किणेकर यांनी बेळगाव लाईव्ह शी बोलताना व्यक्त केले आहे.
सुपीक जमिनीचें संपादन टाळण्यासाठी रिंग रोड एवजी संबंधित ठिकाणी फ्लाय ओव्हर ब्रिजची उभारणी करण्यास काहीच हरकत नसावी. बसवन कुडची पासून व्हाया बस स्टँड, चन्नम्मा सर्कल हिंडलगा केएलई ते व्हाया राणी चन्नम्मा सर्कल ते पिरनवाडी आणि सुवर्ण विधानसौध ते ओल्ड पी. बी. रोड काकतीपर्यंत तीन फ्लाय ओव्हर ब्रिज निर्माण केल्यास जमीन संपादन होणार नाही आणि रहदारीची समस्यादेखील सुटेल असे मत माजी आमदार मनोहर किणेकर यांनी व्यक्त केले आहे.
प्रत्येक विकास कामासाठी सरकारला शेतकऱ्यांच्या शेत जमिनीचा का लागतात? असा सवाल करून किनेकर म्हणाले की शेतजमिनींचे भूसंपादन करून त्यावर भूखंड पाडून निवासी अथवा व्यापारी संकुल उभारण्यापेक्षा सरकारच्या मालकीच्या बऱ्याच जागा आहेत. त्या ठिकाणी असे प्रकल्प राबविले जावेत.
बेळगाव स्मार्ट सिटी बनत आहे. आज ना उद्या बेळगावची देशातील मोठ्या शहरांमध्ये गणना होणार आहे. ही वस्तुस्थिती लक्षात घेऊन शहरात इमारतींना मजल्यांचे बंधन न घालता बहुमजली निवासी इमारती बांधण्यास परवानगी दिली जावी. हा देखील एक चांगला पर्याय होऊ शकतो. त्यामुळे लोकांची घराची गरज भागेल आणि शेतजमिनीही वाचतील असे मनोहर किणेकर म्हणाले. त्याचप्रमाणे राष्ट्रीय पक्षांच्या लोकप्रतिनिधींनी याकडे गांभीर्याने लक्ष द्यावे, अशी मागणीही त्यांनी केली.
पुढील काही दिवसांत सुपीक जमिनी संपादना विरोधात बेळगावात महाराष्ट्र एकीकरण समिती मोर्चा काढून मोठे जन आंदोलन उभे करत तालुक्यातील शेतकऱ्यांच्या सुपिक जमिनी वाचवण्यासाठी पुढाकार घेऊ असे त्यांनी नमूद केले.
