सध्या देशात धुमाकूळ घातलेल्या ‘पुष्पा’ या चंदन तस्करीवर आधारित चित्रपटाप्रमाणेच मिरज (महाराष्ट्र) येथे टेम्पोतून बेकायदेशीररित्या नेण्यात येणारे सुमारे 1 टन वजनाचे रक्तचंदनाचे ओंडके पोलिसांनी जप्त केले असून बाजारभावानुसार या चंदनाची किंमत सुमारे अडीच कोटी रुपये इतकी होते. याप्रकरणी पोलीसांनी कर्नाटकातील एकाला अटक केली आहे.
टेम्पो चालक यासीन इनायतुल्ला खान (रा. 108 /1, आड्डीगर, कलहळ्ळी, ता. अनकेळ, जि. बेंगलोर) असे पोलिसांनी ताब्यात घेतलेल्या आरोपीचे नांव आहे. मिरज शहरातील मिरज -कोल्हापूर रस्त्यावर महात्मा गांधी चौक पोलिस आणि वन विभागाच्या संयुक्त पथकाने काल सोमवारी मध्यरात्री पावणेतीन वाजता नाकेबंदी करून उपरोक्त कारवाई केली. या कारवाईत 983 किलो 400 ग्रॅम वजनाचे रक्तचंदनाचे 32 ओंडके आणि टेम्पो असा 2 कोटी 55 लाख 85 हजार रुपयांचा मुद्देमाल जप्त करण्यात आला आहे. वनविभागाच्या अधिकाऱ्यांनी जप्त केलेले लाकूड हे रक्तचंदन असल्याची खात्री केली आहे.
सदरचे रक्तचंदन बंगलोर येथून कोल्हापूरकडे जात असल्याची प्राथमिक माहिती तपासातून समोर आली आहे. पोलीस चौकशीत आरोपी यासीन खान याने बेंगलोर येथील शहाबाज नामक व्यक्तीने आपल्याला सदरची चंदन कोल्हापूरकडे घेऊन जाण्यास सांगितल्याची कबुली दिली आहे. दरम्यान या रक्तचंदन तस्करीत स्थानिक तस्करांचा सहभाग आहे का? यासह सांगली कोल्हापूर पासून बेंगलोरपर्यंत तपास करून आंतरराज्य रॅकेट उघडकीस आणणार असल्याची माहिती मिरज जिल्हा पोलीस प्रमुख दीक्षितकुमार गेडाम यांनी दिली आहे.
