युद्धग्रस्त युक्रेनमध्ये अडकलेल्या भारतीयांसंदर्भातील जिल्हानिहाय ताज्या माहितीनुसार केएसडीएमए युक्रेन येथील स्टेट इमर्जन्सी ऑपरेशन्स सेंटर (एसईओसी) येथे आज शनिवारी दुपारी 12 वाजेपर्यंत बेळगाव जिल्ह्यातील 12 आणि कर्नाटकातील एकूण 347 जणांची नांवं नोंदवली गेली आहेत.
युक्रेनमध्ये अडकलेल्या कर्नाटकातील विद्यार्थ्यांच्या स्थलांतरासंदर्भात मुख्यमंत्री बसवराज बोम्मई यांनी भारताच्या परराष्ट्र मंत्र्यांशी चर्चा केली असून परराष्ट्रमंत्र्यांनी त्यासंदर्भात संपूर्ण सहकार्य करण्याचे आश्वासन दिले आहे. दरम्यान मुख्यमंत्री कार्यालय, राज्याचे मुख्य सचिव आणि नोडल अधिकारी वैयक्तिकरीत्या युक्रेनमध्ये अडकून पडलेल्या विद्यार्थी व नागरिकांसंदर्भात एमईए आणि किवी येथील दुतावासाशी संधान साधून आहेत. युक्रेनची राजधानी किवी येथील भारतीय दूतावास खुले असून ते अडकून पडलेल्या विद्यार्थी व नागरिकांच्या स्थलांतरासाठी पूर्ण क्षमतेने कार्य करत आहे. भारतीयांच्या सुरक्षित स्थलांतरासाठी पर्यायी व्यवस्था करण्याच्या दृष्टीने दूतावासाकडून युद्ध पातळीवर प्रयत्न केले जात आहेत.
युक्रेनमध्ये अडकलेल्यांसाठी राज्य सरकारने गेल्या गुरुवारी 24 तास कार्यरत राहणारा 080 -1070 आणि 080 -22253707 असे हेल्पलाइन नंबर असणारा स्टेट इमर्जन्सी ऑपरेशन रूम हा आपत्कालीन कक्ष सुरू केला आहे. त्याचप्रमाणे युक्रेनमध्ये अडकलेल्यांची माहिती गोळा करण्यासाठी अवघ्या 12 तासापेक्षा कमी वेळात नवे ॲप वजा पोर्टल विकसित करण्यात आले आहे.
त्यावर जमा होणारी कर्नाटकातील विद्यार्थ्यांची माहिती परराष्ट्र मंत्रालयाशी वास्तविक वेळेच्या आधारे शेअर केली जात आहे. युक्रेनमध्ये अडकून पडलेल्या भारतीयांच्या प्रत्यावर्तनासाठी राज्य सरकारने गेल्या गुरुवारी परराष्ट्र मंत्रालय आणि किवी येथील भारतीय दूतावासाशी समन्वयक साधण्यासाठी केएसडीएमए आयुक्त डॉ. मनोज राजन यांची नोडल अधिकारी म्हणून नियुक्ती केली आहे.
