आपल्या पोटच्या दोन लहान मुलांसह एका महिलेने बेळगाव -वेंगुर्ला रोडवरील आरगन तलावांमध्ये उडी घेऊन आत्महत्या केल्याची खळबळजनक घटना आज दुपारी उघडकीस आली. महिलेसह एका बालकाचा मृतदेह हाती लागला असून दुसऱ्या बालकाचा शोध जारी आहे.
मिळालेल्या माहितीनुसार आरगन तलावामध्ये उडी टाकून आत्महत्या करणाऱ्या महिलेचे नाव क्रिशा मनीष केशवानी (वय 36 वर्षे) रा.सह्याद्री नगर बेळगाव असे असून तिच्या मुलांची नावे भावीर आणि हिरेण अशी आहेत. या दोन्ही मुलांची वय 4 आणि 7 वर्षे असल्याचे सांगण्यात आले.
सदर महिलेने आपल्या दोन्ही मुलांसह तलावात आत्महत्या करण्याचे निश्चित कारण सायंकाळपर्यंत समजू शकले नाही. तथापि कौटुंबिक कलहातून हा प्रकार घडला असावा असा कयास व्यक्त केला जात आहे. मयत कृष्णा केशवानी हिचे माहेर मिरज येथील असून तिचा पती मनीष याचे कपड्याचे दुकान आहे.
महिलेने आपल्या मुलासह आरगन तलावांमध्ये आत्महत्या केलेल्या या घटनेची माहिती मिळताच कॅम्प पोलीस निरीक्षक प्रभाकर धर्मट्टी आदी सहकाऱ्यांनी तत्काळ घटनास्थळी धाव घेतली. त्याप्रमाणे अग्निशामक दल आणि पाणबुड्यांच्या मदतीने मृतदेहांचा शोध घेण्यात आला.
त्यावेळी कृष्मा आणि तिच्या एका मुलाचा मृतदेह हाती लागला. अन्य एका मुलाचा शोध सायंकाळी उशिरापर्यंत सुरू होता. सदर घटनेची कॅम्प पोलिस स्थानकात नोंद झाली आहे. दरम्यान आईने आपल्या पोटच्या दोन मुलांसह आत्महत्या करण्याच्या या घटनेबद्दल सर्वत्र हळहळ व्यक्त होत आहे.
