गोवा निवडणुकीच्या प्रचारात बिझी झालेले बेळगाव उत्तर मतदार संघाचे आमदार अनिल बेनके पुन्हा आपल्या मतदार संघात सक्रिय झाले असून आज बेळगाव जिल्हा रुग्णालयाला त्यांनी सदिच्छा भेट दिली.
शुक्रवारी जिल्हा रुग्णालयाला भेट देऊन तेथील विकासकामांची पाहणी केली. जिल्हा रुग्णालयातील अनेक विभागात उपचार घेणाऱ्या विविध रुग्णांची चौकशी देखील यावेळी आमदारांनी केली. जिल्हा रुग्णालयात उपचारासाठी येणाऱ्या रुग्णांना योग्य वेळेत, योग्य उपचार देण्यासंदर्भात अधिकाऱ्यांना सूचना देण्यात आल्या.
यावेळी आमदारांनी जिल्हा रुग्णालयातील आयसीयू, जनरल वॉर्डमध्ये उपचार घेत असलेल्या रुग्णांच्या आरोग्याची चौकशी केली तसेच रुग्णांना फळांचे वाटप देखील केले. याचप्रमाणे रुग्णालयात रुग्णांसाठी देण्यात येणाऱ्या जेवणाचा दर्जाही आमदारांनी स्वतः तपासला. 
यानंतर प्रसारमाध्यमांना प्रतिक्रिया देताना आमदार बेनके म्हणाले, जिल्हा रुग्णालयात अनेक विकासकामे राबविली जात असून अनेक सकारात्मक बदल देखील करण्यात येत आहेत. आयसीयूसह जनरल वॉर्डचा देखील विकास करण्यात येत आहे.
शिवाय जिल्हा रुग्णालयात दर्जेदार उपचार देण्यात येत आहेत. जिल्ह्यातील नागरिकांनी कोणत्याही आजारासंदर्भात जिल्हा रुग्णालयात उपचार घ्यावेत, असे आवाहन आमदार बेनके यांनी केले. यावेळी रुग्णालय संचालकांसह कर्मचारी हजर होते.
