गेल्या डिसेंबर महिन्यात शहरातील अनगोळ येथील क्रांतिवीर संगोळी रायण्णा यांच्या पुतळ्याची मोडतोड केल्याप्रकरणी पोलिसांनी राजद्रोहासह विविध गुन्हे दाखल केलेल्या चार मराठी युवकांपैकी आणखी एकाला आठव्या जिल्हा सत्र न्यायालयाने सशर्त जामीन मंजूर केला आहे.
न्यायालयाकडून जामीन मंजूर झालेल्या युवकाचे नांव प्रथमेश संभाजी कंग्राळकर (वय 19, रा. कनकदास कॉलनी आंबेडकरनगर, अनगोळ) असे आहे. गेल्या महिन्यात बेंगलोर येथे छत्रपती शिवाजी महाराजांच्या पुतळा विटंबनाच्या घटनेनंतर बेळगावात क्रांतिवीर संगोळी रायण्णा यांच्या पुतळा विटंबनेचा प्रकार घडला होता. याप्रकरणी टिळकवाडी पोलिस स्थानकामध्ये गेल्या 18 डिसेंबर 2021 रोजी गुन्हा नोंदविण्यात आला होता.
टिळकवाडी पोलिसांनी रायण्णा पुतळा विटंबनेचा कारणीभूत ठरवून सुरज कंग्राळकर, ज्योतिबा भांदुर्गे व प्रथमेश कंग्राळकर यांच्यासह अन्य एका अल्पवयीन मुलांवर भा.द.वि. 153 (अ), 295, 427, 124 (अ) आणि R/w 34 कलमान्वये गुन्हे दाखल केले होता. सदर चारही संशयितांनी जामिनासाठी अर्ज केला आहे.
आज या जामीन अर्जावर सुनावणी झाली. यावेळी सदर युवकांवर राजद्रोहाचा गुन्हा दाखल करणे अघटनात्मक असल्याचा युक्तिवाद संशयितांच्या आरोपींच्या वकिलांनी केला. त्यानंतर अखेर न्यायालयाने प्रथमेश संभाजी कंग्राळकर यांचा जामीन मंजूर केला. यापूर्वी सुरज कंग्राळकर यालाही सशर्त जामीन मंजूर केला आहे. त्याचप्रमाणे अन्य एक आरोपी ज्योतिबा भांदुर्गे याला न्यायालयाने अटकपूर्व जामीन मंजूर केला आहे. सदरची माहिती आरोपींचे वकील ॲड. प्रताप यादव यांनी बेळगाव लाईव्हशी बोलताना दिली.
