ओमिक्राॅनचे वाढते रुग्ण आणि कोरोना प्रादुर्भाव परिस्थितीच्या पार्श्वभूमीवर मुख्यमंत्री बसवराज बोम्मई यांनी नववर्षाच्या स्वागताच्या कार्यक्रमांवर निर्बंध जारी केले आहेत.
त्यानुसार 30 डिसेंबर ते 2 जानेवारीपर्यंत राज्यात पार्ट्या किंवा सामूहिक कार्यक्रमांवर बंदी असेल. तथापि 25 डिसेंबर रोजी ख्रिसमस साजरा करण्यावर कोणतेही निर्बंध नसणार आहेत.
नववर्ष स्वागताच्या पार्श्वभूमीवर 30 डिसेंबर ते 2 जानेवारीपर्यंतच्या कालावधीत राज्यातील सर्व रेस्टॉरंट्स फक्त 50 टक्के ग्राहक क्षमतेसह सुरू ठेवण्यास परवानगी असेल. याखेरीज रेस्टॉरंट कर्मचाऱ्यांनी कोरोना प्रतिबंधक लसीचे दोन्ही डोस घेणे अनिवार्य असणार आहे.
त्याचप्रमाणे निवासी संकुल अर्थात अपार्टमेंट्समध्ये पार्ट्या आणि डीजे संगीतावर बंदी असेल. तेथील रहिवासी संघटनांनी या नियमांचे उल्लंघन होणार नाही याची खबरदारी घ्यावी, अशी सक्त सूचना करण्यात आली आहे.
