महाराष्ट्र एकीकरण समितीवर यावेळी निर्णायक कारवाई केली जाईल, असे मुख्यमंत्री बसवराज बोम्मई यांनी जाहीर केले आहे. बेळगाव येथे एका हिंदू संघटनेच्या बैठकीनंतर पत्रकारांशी बोलताना त्यांनी उपरोक्त घोषणा केली.
बेळगावातील काहींना यापूर्वी अटक करून सोडण्यात आले होते. तथापि यावेळी आम्ही प्रमुखांना अटक केली आहे. जो कोणी कायदा हातात घेईल त्याच्यावर आम्ही कडक कारवाई करतो. यावेळी आमची कृती निर्णायक असेल असे मुख्यमंत्र्यांनी स्पष्ट केले. कर्नाटकात आम्ही कांही प्रमुख व्यक्तींना अटक करून त्यांच्यावर नियंत्रण ठेवले आहे. एवढे मोठे काम यापूर्वी कधीच झाले नव्हते. आम्ही महाराष्ट्राच्या गृहसचिवाशी बोललो आहोत आणि कन्नडिगांना योग्य संरक्षण देण्याची मागणी केली आहे अशी माहिती त्यांनी यावेळी दिली.
बेळगावात संगोळी रायण्णा यांच्या पुतळ्याची विटंबना तसेच संबंधित घडलेल्या घटनांसंदर्भात म. ए. समितीवर दोन दिवसात बंदी घालण्याची मागणी कन्नड संघटनांनी राज्य सरकारकडे केली आहे. नेहमी कायदेशीर मार्गाने लढा देणाऱ्या समितीवर बंदीची मागणी करणाऱ्या या संघटनांचे नेतृत्व वाटाळ नागराज करत आहेत.
समितीकडून नेहमी त्रास देऊन राज्यद्रोह केला जातो. त्यांची भूमिका राज्य विरोधी असते, असा आरोप करण्यात आला आहे. संगोळी रायण्णा यांच्या पुतळ्याची विटंबना करून कन्नडिगांचा अवमान केला केला आहे असे कन्नड संघटनांनी म्हंटले आहे.
संगोळी रायण्णा यांच्या पुतळ्याची विटंबना तसेच त्यासंबंधी घडलेल्या घटनांशी संबंधित म. ए. समितीवर बंदी घालण्याची भाषा पशु संगोपन खात्याचे मंत्री प्रभू चव्हाण यांनी केली आहे. याविषयी सोमवारच्या मंत्रिमंडळ बैठकीत चर्चा करण्यात येणार असल्याचेही त्यांनी सांगितले.
