पक्षी निरीक्षक आणि छायाचित्रकारांसाठी आनंदाची गोष्ट म्हणजे स्थलांतरित पक्षी आपल्या हिवाळी मुक्कामासाठी बेळगावात दाखल होऊ लागले आहेत. परिणामी या स्थलांतरित पक्षांची छायाचित्रे काढून माहिती मिळवण्याचे वेड सध्या शिगेला पोहोचले असून यामध्ये प्रामुख्याने युवापिढी आघाडीवर आहे.
हे पक्षी निरीक्षक आणि छायाचित्रकार आपल्या दुर्बिणी किंवा कॅमेरासह सध्या व्हॅक्सिन डेपो परिसरात तसेच येळ्ळूर रोडवरील बेळ्ळारी नाल्याच्या काठ, व्हीटीयु विद्यापीठाशेजारील ट्री पार्क, गोकाक तालुक्यातील घटप्रभा पक्षी अभयारण्य आणि खानापूरच्या भीमगड वन्यजीव अभयारण्यात वावरताना दिसत आहेत. सूत्रांच्या माहितीनुसार 29.78 चौरस कि. मी. परिसरात पसरलेल्या घटप्रभा पक्षी अभयारण्यामध्ये यंदा पक्षांच्या विभिन्न 225 प्रजाती आढळून आल्या आहेत.
युरोपियन पांढरा करकोचा, काळा कोतवाल पक्षी, हॉर्नबिल अर्थात धनेश पक्षी, कोकण भागात आढळणारा व्हाईट चिकन बार्बेट अर्थात कुकडूक्या आदी पक्ष्यांचा यामध्ये समावेश आहे. भीमगड वन्यजीव अभयारण्य पश्चिम घाटातील 190.43 चौरस कि. मी. परिसरात पसरलेले आहे. बेळगाव आणि परिसरातील पक्षी निरीक्षक भगवान महावीर वन्यजीव अभयारण्याला देखील भेट देत आहेत. हे अभयारण्य 107 चौरस कि. मी. प्रदेशात पसरलेले आहे. या ठिकाणी पक्ष्यांच्या विविध 120 हून अधिक प्रजाती आढळून आल्या आहेत. ज्यामध्ये देशभरात आढळणारा गोल्डन ओरिओले अर्थात हळद्या पक्षी, पाचू कवडा, सर्वसामान्य राखाडी धनेश, पॅराडाईज फ्लायकॅचर अर्थात शाही बुलबुल, महाधणेश पक्षी आदी पक्ष्यांचा समावेश असल्याची माहिती सुप्रसिद्ध व्यवसायिक आणि उत्कंठ वन्यजीव छायाचित्रकार जयदीप सिद्दण्णावर यांनी दिली.
बेळगाव परिसरातील आपले पक्षी निरीक्षण आणि छायाचित्रणा बाबतीत बोलताना सिद्दण्णावर यांनी बेळगावमध्ये विशेष करून पश्चिम घाट आणि घटप्रभा पक्षी अभयारण्यामध्ये पक्ष्यांच्या अनेक उत्तम प्रजाती आढळून येतात. त्यामुळे फक्त कर्नाटकातील पक्षी छायाचित्रकारच नव्हे तर अन्य राज्यातील छायाचित्रकार देखील या परिसराने भेटी देत असतात, असे स्पष्ट केले.
हिवाळ्याच्या मोसमात मुंबई, पुणे, गोवा, हुबळी -धारवाड आणि अन्य ठिकाणचे उत्कंठ पक्षी छायाचित्रकार बेळगावला भेट देत असतात, अशी माहिती पक्षी निरीक्षक आणि छायाचित्रकार असणाऱ्या मिलिंद पावशे यांनी दिली. सोशल मीडियावर पक्षीनिरीक्षक आणि छायाचित्रकारांचे कांही गट निर्माण झाले असून या गटातील प्रत्येक सदस्य आपला किंवा आपली माहिती आणि पक्षी निरीक्षण तसेच त्यांची प्रजाती व आढळून आलेले ठिकाण याबाबत एकमेकांना माहिती देत असतो. यापैकी बहुतांश सदस्य हे बेळगावकडे आकर्षित झाले आहेत.
कारण या ठिकाणी हिवाळ्यामध्ये पक्ष्यांच्या विभिन्न प्रजाती आढळून येत असतात असेही पावशे यांनी स्पष्ट केले. ब्ल्यू बिअरडेड बी -इटर ही पक्षाची दुर्मिळ प्रजाती मला आढळून आल्याची माहिती मी सोशल मीडियावर प्रसिद्ध करताच पुणे येथील छायाचित्रकारांचा एक समूह संबंधित पक्षाचे छायाचित्र टिपण्यासाठी बेळगावात दाखल झाला होता, असे मिलिंद पावशे यांनी सांगितले. त्याचप्रमाणे दरवर्षी हिवाळ्याच्या मोसमात स्टेप्पी ईगल अर्थात नेपाळी गरुड हा रशियातून भारतात स्थलांतरित होणाऱ्या पक्षी देखील बेळगाव परिसरात पहावयास मिळतो, अशी माहितीही त्यांनी दिली.
