बेळगाव शहरानजीकच्या बामणवाडी गावाजवळ काल गुरुवारी रात्री 10 च्या सुमारास एका इसमाचा विष प्राशन करून आत्महत्या केलेल्या अवस्थेतील मृतदेह आढळून आला.
बामणवाडी गावाजवळ काल गुरुवारी रात्री 10 च्या सुमारास एका गावकर्‍याला एक इसम रस्त्याकडेला झुडपानजीक संशयास्पद अवस्थेत पडलेला आढळून आला.
त्याने याबाबतची माहिती माजी महापौर विजय मोरे आणि सामाजिक कार्यकर्ते ॲलन मोरे यांना दिली. तेंव्हा त्या उभयतांनी तात्काळ घटनास्थळी धाव घेऊन एकंदर परिस्थितीचा अंदाज घेऊन शहानिशा केली.
त्यावेळी संबंधित रस्त्याकडेला पडलेल्या इसमाने विष प्राशन करून आत्महत्या केल्याचे त्यांच्या लक्षात आले. तसेच मयत इसम हा बैलहोंगलचा असल्याचे स्पष्ट झाले. तेंव्हा विजय मोरे यांनी लागलीच याबाबतची माहिती पोलिस आणि मृताच्या कुटुंबीयांना दिली.
घटनास्थळी दाखल झालेल्या पोलिसांनी रात्री उशीर झाल्यामुळे रात्रभर त्या ठिकाणी थांबून आज सकाळी 8:30 च्या सुमारास पंचनामा करून मृतदेह शवागाराकडे धाडला.
या सहकार्य व कर्तव्यदक्षतेबद्दल माजी महापौर मोरे यांनी पोलिस अधिकाऱ्यांसह महामार्ग पोलीस गस्ती पथकाचे आभार मानले आहेत. घटनास्थळी ग्रामपंचायत सदस्य संजय अणबर, पुंडलिक पैनाचे आणि स्थानिक ग्रामस्थ उपस्थित होते.
