दिवंगत केंद्रीय रेल्वे राज्यमंत्री बेळगावचे खासदार सुरेश अंगडी यांची कन्या श्रद्धा अंगडी उर्फ शेट्टर यांनी बेळगाव ग्रामीण मतदार संघातून आमदार पदासाठी आगामी विधानसभा निवडणूक लढवावी, अशी आग्रही मागणी तालुक्यातील विविध गावांमधील भाजप नेतेमंडळींनी केली आहे.
बेळगाव ग्रामीण मतदार संघातील विविध गावातील नेतेमंडळींनी आज बुधवारी सकाळी दिवंगत खासदार सुरेश अंगडी यांच्या गृहकचेरीमध्ये त्यांची कन्या श्रद्धा शेट्टर यांची भेट घेऊन उपरोक्त आग्रह केला.
तुम्ही खूप सक्रियतेने काम करत आहात. सर्व जाती -भाषा -धर्माच्या लोकांना एकत्रित घेऊन तुमचे कार्य सुरू आहे. तुमच्यासारख्या लोकप्रतिनिधींची आम्हाला गरज आहे. तेंव्हा कांहीही करा पण तुम्हीच बेळगाव ग्रामीण मतदारसंघातून भाजप उमेदवार म्हणून निवडणूक लढवा, अशी मागणी यावेळी विविध गावचे नेते मंडळींकडून श्रद्धा अंगडी उर्फ शेट्टर यांच्याकडे करण्यात आली.
आपणाला निवडणुकीत विजय करून आमदार केल्यास आमच्याकडून दिवंगत सुरेश अंगडी साहेबांना खऱ्या अर्थाने श्रद्धांजली वाहिल्या सारखे होईल. तेंव्हा आपण विधानसभा निवडणूक लढवलीच. पाहिजे आम्ही सर्वजण तुमच्या पाठीशी आहोत, असेही या नेतेमंडळींनी यावेळी सांगितले.
याप्रसंगी खासदार मंगला अंगडी या देखील उपस्थित होत्या. श्रद्धा शेट्टर या नेतेमंडळींचे म्हणणे ऐकून घेतल्यानंतर बोलताना म्हणाल्या की, सध्यातरी समाजसेवे व्यतिरिक्त माझ्या डोक्यात दुसरा विचार नाही. तेंव्हा विधानसभा निवडणूक लढविणे ही दूरची गोष्ट आहे.
तथापि आपल्या विनंतीला मान देऊन मी यासंदर्भात माझी आई आणि आप्तस्वकीयांशी चर्चा करेन. याबाबतीत निर्णय घेण्यासाठी मला थोडा वेळ हवा आहे. याखेरीज निवडणूक कोण लढविणार? याचा निर्णय भाजप कोर कमिटी घेत असते आणि त्यावर हाय कमांड शिक्कामोर्तब करते. त्यामुळे तूर्तास आमदारकीची निवडणूक लढविण्याचा बाबतीत मी ठामपणे कांही सांगू शकत नाही, असे श्रद्धा शेट्टर यांनी स्पष्ट केले. याप्रसंगी बेळगाव ग्रामीण भागातील विविध गावचे भाजप स्त्री-पुरुष पदाधिकारी व कार्यकर्ते बहुसंख्येने उपस्थित होते.
