गेल्या दीड-दोन वर्षांपासून कोरोना आणि लाॅक डाऊनमुळे आमचा व्यवसाय ठप्प होऊन उदरनिर्वाहाचा प्रश्न निर्माण झाला आहे. तेंव्हा सरकारने आम्हाला आर्थिक मदत करण्याबरोबरच येत्या गणेशोत्सवादरम्यान श्री गणेश आगमन आणि विसर्जनाप्रसंगी फक्त 3 तासांसाठी आम्हाला आमचा साऊंड आणि लाईटचा व्यवसाय करण्यास सशर्त परवानगी द्यावी, अशी मागणी बेळगाव साऊंड अँड लाईट असोसिएशनच्यावतीने एका निवेदनाद्वारे जिल्हाधिकार्‍यांकडे करण्यात आली आहे.
गेल्या 2019 मध्ये महापुरामुळे आमचा व्यवसाय झाला नव्हता. त्यानंतर 2020, 2021 या वर्षांमध्ये कोविड आणि लाॅक डाऊनमुळे सर्व कार्यक्रम आणि सण रद्द झाल्यामुळे आमचा धंदा झाला नाही. अनलॉकींगची प्रक्रिया सुरू झाल्यानंतर इतर व्यवसाय सुरू झाले, आमचे मात्र बंदच आहेत. घरगुती आणि सार्वजनिक कार्यक्रमांवरील निर्बंधाचा फटका आम्हाला बसला आहे.
महामारीमुळे निर्माण झालेली प्रतिकूल परिस्थिती लक्षात घेऊन सरकारने विणकर, नाभिक आदी समाज बांधवांना आणि कांही व्यावसायिकांना सहाय्य धनाच्या स्वरूपात नुकसान भरपाई दिली आहे. मात्र आम्हाला तीसुद्धा मिळालेले नाही. या संदर्भात मागील वर्षी आम्ही जिल्हाधिकारी आणि पालकमंत्र्यांना निवेदन दिले होते. सरकारने एक तर आम्हाला कांहीतरी आर्थिक मदत द्यावी किंवा गणेशोत्सव काळात दोन स्पीकर व दोन बेस लावण्याची परवानगी द्यावी, अशी मागणी आम्ही केली होती. कोरोनाचे सर्व नियम पाळून आम्ही आमचा व्यवसाय करू असे आम्ही स्पष्ट केले होते. मात्र अद्यापपर्यंत कोणतीही कार्यवाही झालेली नाही.
बेळगाव सुमारे 350 फक्त साऊंड आणि लाईट व्यावसायिक आहेत. बेळगाव साऊंड अँड लाईट असोसिएशन संघटना अशी आमची वेगळी संघटना देखील आहे. आम्हा प्रत्येकाकडे किमान 4 ते 6 कामगार आहेत. त्यामुळे एकंदर 3,500 ते 4 हजार लोकांचे पोट या एका व्यवसायावर चालते. सलग तीन वर्षे एखाद्या व्यवसाय बंद राहणे ही मोठी बाब आहे. सरकारने याकडे गांभीर्याने लक्ष दिले पाहिजे. आमची एवढीच मागणी आहे की यंदाच्या गणेशोत्सवासाठी सरकारने श्री गणेश आगमन आणि विसर्जन याप्रसंगी म्हणजे गणेशोत्सवाच्या पहिल्या, पाचव्या, सातव्या, नवव्या आणि अकराव्या दिवशी मंडपासमोर फक्त गल्लीमध्ये केवळ 3 तासांसाठी आम्हाला दोन बेस व दोन टॉप लावण्याची परवाणगी दिली जावी. आम्ही सर्व अटी -नियम पाळून आमचा व्यवसाय करू जेणेकरून आमचे आणि आमच्यावर अवलंबून असलेल्या कामगारांचे पोट भरेल, अशा आशयाचा तपशील निवेदनात नमूद आहे.
जिल्हाधिकाऱ्यांना निवेदन सादर करतेवेळी बेळगाव साऊंड अँड लाईट असोसिएशनचे अध्यक्ष श्याम गोंडाडकर, उपाध्यक्ष साई कणेरी आणि सेक्रेटरी प्रवीन प्रभू यांच्यासह अन्य पदाधिकारी व सदस्य उपस्थित होते.
