उद्या सोमवार दिनांक 5 जुलै पासून, कर्नाटक राज्यातील मंदिरे,मस्जिद, चर्च व अन्य प्रार्थनास्थळे खुली करण्याचा निर्णय घेण्यात आला आहे.खुली करण्यात आलेली मंदिर व प्रार्थना स्थानांमध्ये भक्तांसाठी कोरोनाच्या पार्श्वभूमीवर नियम आणि अटी लागू करण्यात आले आहेत.
दरम्यान बेळगाव जिल्ह्यातील सौंदत्ती येथील रेणुका देवीचे देवस्थान पुढील आदेशा पर्यंत बंदच राहणार असल्याची माहिती बेळगावचे जिल्हाधिकारी एम.जी. हिरेमठ यांनी दिली आहे.
मुख्यमंत्री येडीयुरप्पा यांनी कर्नाटक राज्यातील अनलॉक 3.0 ची घोषणा करताना कोरोना काळातील विविध निर्बंध शिथिल केले होते. त्याचबरोबर राज्यातील विविध जिल्ह्यातील कोरोना ची परिस्थिती पाहून जिल्हा पालकमंत्री आणि जिल्हाधिकाऱ्यांनी निर्बंधाबाबत योग्य तो निर्णय घेण्याची सूचनाही केली होती. त्यानुसार सौंदत्ती रेणुका देवी देवस्थान बरोबरच सौंदत्ती जोगनभावी येथील सत्यवती देवी मंदिर पुढील आदेशा पर्यंत बंद राहणार आहेत.
या तिन्ही मंदिरांना महाराष्ट्र,कर्नाटक, गोवा, आंध्र प्रदेश येथील भाविक मोठ्या संख्येने येत असतात. सध्या बेळगाव जिल्हा लगतच्या महाराष्ट्रातील कोल्हापूर, सांगली, सातारा या जिल्ह्यांमध्ये कोरोन चा प्रभाव अद्यापही कायम आहे. महाराष्ट्रातील या तीन जिल्ह्यांमधून सौंदत्ती रेणुका देवस्थानला मोठ्या संख्येने भाविक येत असतात. त्यामुळे बेळगाव जिल्ह्यात कोरोनाचा संसर्ग वाढू नये याची दक्षता घेत, जिल्हाधिकारी हिरेमठ यांनी सौंदती रेणुका मंदिरे व जोगनभावी मंदिर बंद ठेवण्याचा निर्णय घेतला आहे.
याचबरोबर सौंदत्ती रेणुका मंदिर परिसरातील संपूर्ण दुकाने पुढील आदेशापर्यंत बंद ठेवण्यात यावीत अशी सूचना ही सौंदत्ती पोलिसांना करण्यात आली आहे.जिल्हाधिकाऱ्यांनी बजावलेल्या आदेशाचे पालन करण्यात यावे. श्री रेणुका देवी भक्तांनी घरात राहूनच देवीची आराधना करावी व प्रशासनाला सहकार्य करावे, असे आवाहन श्री रेणुका देवी देवस्थान चे विशेष कार्यकारी अधिकारी रवी कोटारगस्ती यांनी केले आहे.
