बेळगाव शहर परिसरासह तालुक्यात सध्या मान्सूनचे खऱ्या अर्थाने आगमन झाले आहे. काल सायंकाळपासून पावसाचा जोर वाढल्यामुळे सर्वत्र पाणीच पाणी झाले असून शहर परिसरात घरांच्या पडझडीच्या घटना करण्याबरोबरच राष्ट्रीय महामार्ग पाण्याखाली गेला आहे.
शहरासह तालुक्यात गेल्या चार दिवसापासून पावसाची रिपरिप सुरू असल्यामुळे हवेत गारठा निर्माण झाला आहे. गेल्या मंगळवारी रात्रीपासून पावसाचा जोर वाढला असून बुधवारी पावसाच्या अधून-मधून जोराच्या सरी कोसळत होत्या. त्यामुळे शहरातील जनजीवन काहीसे विस्कळित झाले होते.
पावसामुळे साऱ्यांनाच रेनकोट, छत्री यांचा आधार घ्यावा लागत आहे. काल सायंकाळपासून मुसळधार पावसाला सुरुवात झाल्यामुळे शहरातील सखल भागांमध्ये पाणी साचले असून अर्धवट अवस्थेत असलेल्या स्मार्ट सिटीच्या विकास कामांच्या ठिकाणी चिखलाचे साम्राज्य पसरले आहे. या ठिकाणच्या रस्त्यावरील चिखलाच्या दलदलीमुळे पादचारी आणि दुचाकी वाहनचालकांना मोठा मनस्ताप सहन करावा लागत आहे.
मुसळधार पावसामुळे सरदार ग्राउंडनजीकच्या कंग्राळी गल्ली येथील नागेश निर्मळकर यांच्या घराची भिंती कोसळून मोठे नुकसान झाले आहे. घरामधील सार्वजनिक मंडळाची डॉल्बीचे साहित्य, इलेक्ट्रॉनिक वस्तू व घरगुती सामानाची नासधूस झाल्यामुळे सुमारे 3 लाखाचे नुकसान झाले आहे. याप्रमाणे शहर परिसरासह तालुक्यात कांही ठिकाणी पावसामुळे घरांची पडझड झाल्याच्या घटना घडल्या आहेत.
संततधार पावसामुळे शहर परिसरासह तालुक्यातील नदी-नाल्यांच्या पाणीपातळीत वाढ झाली आहे. कांही ठिकाणी नाले तुडुंब भरून ओसंडून वाहत आहेत. या ओसंडून वाहणाऱ्या नदी-नाल्यांच्या पाण्यामुळे आज सकाळी शहरानजीकचा राष्ट्रीय महामार्ग क्रमांक 4 ठिकाणी पाण्याखाली गेल्याचे चित्र पहावयास मिळाले. त्यामुळे महामार्गावरील नेहमीच्या भरधाव वाहतुकीला ब्रेक लागला होता. रस्त्यावरील पाण्यामधून वाहन चालक काळजीपूर्वक संथगतीने आपली वाहने हाकताना दिसत होते. राणी चन्नम्मा विद्यापीठ, गोवा गेट हॉटेल आदी ठिकाणी राष्ट्रीय महामार्गावर पावसाचे पाणी आले होते.
पावसाची रिपरिप सुरूच असल्यामुळे शहराच्या मुख्य बाजारपेठेतील रस्त्यावरील भाजी विक्रेत्यांना छत्रीचा आसरा घ्यावा लागला. या महिन्यात म्हणावा तसा जोरदार पाऊस झालेला नव्हता. भात रोप लागवड व अन्य कामासाठी जोरदार पावसाची आवश्यकता होती. त्यामुळे सध्या पडणाऱ्या पावसामुळे शेतकऱ्यांना दिलासा मिळाला आहे. सध्या शिवारातील रोप लागवड केली जात आहे.
कंग्राळ गल्लीत कोसळले घर
मुसळधार पावसामुळे सरदार ग्राउंड जवळील कंग्राळ गल्ली येथील नागेश निर्मळकर यांच्या घराचे भिंती कोसळून मोठे नुकसान झाले आहे घरामध्ये सार्वजनिक मंडळाची डॉल्बी चे साहित्य इलेक्ट्रॉनिक वस्तू व घरगुती सामानाचे यांचे तीन लाखांचे नुकसान झाले आहे
खडे बाजार मध्ये कोसळले घर
खडे बाजार बेळगाव मध्ये असे कोसळले जुनाट पडके घर-खडे बाजारात कुणीही नसलेल जुनाट पडके घर कोसळले आहे. या घरात कुणीही रहात नसल्याने सुदैवाने कोणीतही जीवित हानी झाली नाही
