मुतगा (ता. बेळगाव) येथील सरकारी प्राथमिक आरोग्य केंद्र समोरील नियोजित समुदाय भवनाचा भूमिपूजन समारंभ नुकताच मोठ्या उत्साहात पार पडला.
मुतगा येथील सरकारी प्राथमिक आरोग्य केंद्र समोरील नियोजित समुदाय भवनाचा भूमिपूजन समारंभ सोमवारी प्रमुख पाहुणे ता. पं. सदस्य सुनील अष्टेकर आणि मुतगा ग्रा. पं. अध्यक्ष भालचंद्र पाटील यांच्या हस्ते पार पडला. याप्रसंगी माजी महापौर शिवाजी सुंठकर, ग्रा. पं. उपाध्यक्षा रुक्मिणी सिंगारी, सदस्य संजय पाटील, सुनिल चौगुले, बबीता पाटील, भारता पाटील, शीला मल्लोगोळ, मारुती पुजारी, माजी ता. पं. सदस्य शामराव पाटील, प्राथमिक आरोग्य केंद्राच्या डॉ. किवडसन्नावर आदी उपस्थित होते.
मुतगा सरकारी प्राथमिक आरोग्य केंद्राच्या ठिकाणी लसीकरण वगैरे सारखा उपक्रम मोठ्या प्रमाणात राबविण्यासाठी प्रशस्त निवाऱ्याच्या जागेचा अभाव होता.
उन्हा -पावसात हे उपक्रम राबवताना जनतेची मोठी गैरसोय होत होती. याची गांभीर्याने दखल घेऊन ता. पं. सदस्य सुनील अष्टेकर यांनी मागील तालुका पंचायतीच्या बैठकीमध्ये समुदाय भवन उभारणीसाठी पंचायतीच्या फंडातून 5 लाख रुपये मंजूर करून घेतले आहेत.
विविध सरकारी तसेच अन्य सेवाभावी उपक्रम पुन्हा पावसाचा त्रास न होता सुरळीत पणे राबवता यावेत या उद्देशाने हे समुदाय भवन उभारण्यात येत आहे. प्राथमिक आरोग्य केंद्र समोरील या समुदाय भवनाच्या उभारणीसह अन्य कांही विकासकामांसाठी मी तालुका पंचायत निधीतून 10 लाख रुपये मंजूर करून घेतले असून यापैकी 5 लाख रुपये समुदाय भवनावर तर उर्वरित 5 लाख रुपये इतर विकासकामांवर खर्च केले जाणार आहेत, असे ता. पं. सदस्य सुनील अष्टेकर यांनी बेळगाव लाईव्हशी बोलताना सांगितले.
तसेच येत्या दोन -तीन दिवसात समुदाय भवन उभारणीचे काम सुरू होईल, अशी अपेक्षाही व्यक्त केली. दरम्यान, सुनील अष्टेकर यांच्या प्रयत्नांमुळे समुदाय भवनाची उभारणी होत असल्याबद्दल मुतगा परिसरातील नागरिक त्यांना धन्यवाद देत आहेत.
