राज्याचे आगामी हिवाळी अधिवेशन बेळगावच्या सुवर्ण विधानसौधमध्ये आयोजित करण्याद्वारे ते उत्तर कर्नाटकाचे प्रशासकीय केंद्र बनवावे, अन्यथा संपूर्ण उत्तर कर्नाटकात तीव्र आंदोलन छेडले जाईल, असा इशारा निधर्मी जनता दलाचे नेते अशोक पुजारी यांनी दिला आहे.
शहरातील कन्नड साहित्य भवन येथे आज शुक्रवारी आयोजित पत्रकार परिषदेमध्ये बोलताना पुजारी म्हणाले की, उत्तर कर्नाटकातील जनतेच्या मागण्या मांडण्याबरोबरच येथील समस्यांचे निवारण व्हावे, या उद्देशाने सुवर्ण विधानसौधची उभारणी करण्यात आली आहे.
तथापि गेल्या तीन वर्षापासून येथे अधिवेशनच झालेले नाही. जोपर्यंत सुवर्ण विधानसौध येथे अधिवेशन होणार नाही तोपर्यंत येथील प्रशासकीय विकेंद्रीकरण होणे नाही. तेंव्हा आगामी अधिवेशन बेळगाव सुवर्ण विधानसौधमध्ये दोन महिने चालवून उत्तर कर्नाटकातील दुर्लक्षित प्रदेश आणि प्रश्नांवर चर्चा केली जावी, असे पुजारी म्हणाले.
हिवाळी अधिवेशनाचे आयोजन करून बेळगाव सुवर्ण विधानसौध उत्तर कर्नाटकाचे प्रशासकीय केंद्र बनवले जावे. यासाठी या भागातील लोकप्रतिनिधींनी पाठपुरावा करून राज्य सरकारवर दबाव आणला पाहिजे, ही त्यांची नैतिक जबाबदारी आहे.
जर हिवाळी अधिवेशन बेळगाव सुवर्ण विधानसौध येथे झाले नाही तर ऑगस्टच्या पहिल्या आठवड्यापासून राजकीय आंदोलनाला सुरुवात केली जाईल. याची सरकारने दखल घेतली नाही तर संपूर्ण उत्तर कर्नाटकात तीव्र आंदोलन छेडले जाईल, असेही निजद नेते अशोक पुजारी यांनी स्पष्ट केले.
