काल कॅम्प येथे एका 3 वर्षाच्या चिमुकल्या बालिकेवर दोघांकडून झालेल्या लैगिक अत्याचाराच्या निंद्य घटनेचा बापट गल्ली येथील नागरिक व व्यापाऱ्यांनी सकाळी एक तास आपापले व्यवहार बंद ठेवून जाहीर निषेध केला.
कॅम्प येथे उघडकीस आलेल्या 3 वर्षीय बालिकेवरील लैंगिक अत्याचाराच्या घटनेचा बापट गल्ली येथील नागरिक व व्यापाऱ्यांनी तीव्र निषेध नोंदविला आहे. यासाठी येथील व्यापाऱ्यांनी आज बुधवारी सकाळी आपापली दुकाने एक तास बंद ठेवली.
त्याप्रमाणे गल्लीतील नवहिंद युवक मंडळाच्या फलकानजीक सभा घेऊन शहरात कॅम्प येथील घटनेची पुनरावृत्ती होऊ नये यासाठी लैंगिक अत्याचार करणाऱ्या त्या दोघा नराधमांवर कठोर कारवाई करण्यात यावी, अशी जोरदार मागणी करण्यात आली.
जातपात न पाहता पीडितांच्या कुटुंब सोबत राहून ज्यांनी बालिकेवर अत्याचार केला त्याना कठोर शासन व्हावे. मग ते कोणत्याही जाती धर्माचे असोत, यासाठी पोलिस प्रशासनाने योग्य कायदेशीर कारवाई करावी. तसेच पुन्हा अशा घटना समाजात घडू नयेत यासाठी पालकांनी आपल्या लहान अल्पवयीन मुलींच्या बाबतीत जागरूक राहून दक्षता घ्यावी.
मुलींनी अनोळखी व्यक्ती संशयास्पद वाटल्यास घरी सांगावे आणि अशा दुर्देवी घटनांना टाळाव्यात, असे आवाहन करून सभेत कालच्या घटनेचा जाहीर निषेध करण्यात आला.
याप्रसंगी बापट गल्लीतील पंच, ज्येष्ठ नागरिक, व्यापारी व नागरिक बहुसंख्येने उपस्थित होते.
