कोरोनाला थोपवण्यासाठी राज्यसरकारने मार्गदर्शक सूचीमध्ये पुन्हा बदल केला असून आता आज रविवारपासून राज्यात बाजारपेठेत भाजीपाला आणि विक्री आठवडी बाजाराला बंदी असणार आहे. त्याऐवजी दररोज सकाळी 6 ते सायंकाळी 6 वाजेपर्यंत हातगाडीवरून भाजीपाला आणि फळांची विक्री करता येणार आहे. किराणा दुकाने आणि एपीएमसी मार्केट सकाळी 6 ते दुपारी 12 वाजेपर्यंत सुरू ठेवण्यास मुभा असून दूध विक्रीची वेळ देखील सायंकाळी 6 वाजेपर्यंत असणार आहे.
कोरोनाचा वाढता प्रादुर्भाव रोखण्यासाठी राज्य सरकारने गेल्या मंगळवारी रात्री 9 वाजल्यापासून 14 दिवसांकरिता क्लोज डाऊन घोषित केला आहे. या कालावधीत अत्यावश्यक सेवा वगळता उर्वरित सर्व क्षेत्रांवर निर्बंध घालण्यात आले होते. फक्त सकाळी 6 ते 10 या कालावधीतच बाजारपेठा सुरू करण्याची मुभा दिली होती. मात्र अलीकडे कांही दिवसात भाजी मार्केट आणि बाजारपेठांमध्ये मोठ्या प्रमाणात गर्दी होऊन संसर्ग वाढीचा धोका निर्माण झाल्यामुळे सरकारने शनिवारपासून कोरोना मार्गदर्शक सूचित पुन्हा बदल केला आहे. राज्य सरकारचे मुख्य सचिव आणि राज्य आपत्ती नियंत्रण प्राधिकरण कार्यकारी समितीचे सदस्य यांना मंजुनाथ प्रसाद यांनी हा आदेश जारी केला आहे.
नव्या आदेशानुसार भाजीपाल्याच्या बाजारपेठा पूर्णपणे बंद करण्याचे आदेश देण्यात आले आहेत. त्याऐवजी सकाळी 6 वाजल्यापासून सायंकाळी 6 वाजेपर्यंत हातगाडीवरून गल्लोगल्ली फिरून भाजी, फळे व इतर जीवनावश्यक वस्तूंची विक्री करण्यास परवानगी देण्यात आली आहे. हातगाडीवर विक्री होणाऱ्या भाजी फळांसाठी ज्यादा दर न आकारता बाजारपेठेतील दरानेच विक्री करावी. तसेच यावेळी कोरोना नियमांचे पालन करणे सक्तीचे आहे असे सरकारने आदेशात म्हंटले आहे.
जीवनावश्यक वस्तू खरेदीसाठी सकाळी 10 पर्यंत देण्यात आलेली वेळ पुरेशी नसल्याने किराणा दुकाने सुरू ठेवण्याची वेळ वाढवून द्यावी अशी मागणी करण्यात आली होती. शिवाय दूरवरून एपीएमसीमध्ये येणाऱ्यांना सकाळी लवकर पोहोचून खरेदी पूर्ण करणे शक्य होत नव्हते. त्यामुळे शेतकरी, व्यापारी व नागरिकांच्या हितासाठी सरकारने किराणा दुकाने व एपीएमसी मार्केट सकाळी 6 ते दुपारी 12 या कालावधीत सुरू ठेवण्यास परवानगी दिली आहे. त्याचप्रमाणे दूध विक्रीचे बूथ देखील सायंकाळी 6 पर्यंत सुरू ठेवण्यास मुभा देण्यात आली आहे.
