गावच्या हद्दीतील रस्त्यावर व मार्कंडेय नदी काठी तसेच गल्ली बोळाच्या कोपऱ्यांवर कोणीही कचरा टाकू नये. जर कचरा कोणी टाकल्यास त्यांना रोख 1000 रु. दंड आकारण्यात येईल, असा इशारा कंग्राळी खुर्द ग्रामपंचायतीने दिला आहे.
दंडाचा इशारा देण्याबरोबरच जे कोण कचरा टाकणार्‍यांची माहिती पंचायतीची देतील त्यांना रोख 500 रुपयांचे बक्षीस देण्यात येईल, असेही जाहीर करण्यात आले आहे. कंग्राळी खुर्द येथील मार्कंडेय नदीच्या पुलावरील रस्त्याशेजारी मोठ्या प्रमाणात कचऱ्याच्या पिशव्या व कचरा टाकला जात आहे.
त्याचप्रमाणे नदीकाठचा परिसर ही अस्वच्छ केला जात आहे. याची गांभीर्याने दखल घेऊन ग्रामपंचायतीने उपरोक्त कारवाई करण्याचा निर्णय घेतला आहे. गावामध्ये कचरा गाडीची सोय उपलब्ध करून दिलेली आहे, तरी सर्व गावकरी मंडळी आणि इतर परीसरातील नागरिकांनी कचरा गाडीतच टाकावा, असे ग्रामपंचायतीच्यावतीने कळविण्यात आले आहे.
याखेरीज कंग्राळी गावच्या हद्दीतील रस्त्यावर व नदी काठी जाफरवाडी, कोडोली, केदनूर, अगसगे, हंदीगनूर, बंबरगे, गुंजेनट्टी, मणिकेरी या गावातील कोणीही कचरा टाकू नये.
जर कचरा कोणी टाकल्यास त्यांना रोख 5000 रुपये दंड आकारण्यात येईल आणि वादविवाद केल्यास पोलिसात तक्रार करण्यात येईल. यांची संबंधित गावातील गावकर्‍यांनी नोंद घ्यावी, असा इशाराही कंग्राळी खुर्द ग्रामपंचायतीतर्फे देण्यात आला आहे.
