बेळगाव शहरातील 18 प्रमुख गल्ल्यांपैकी प्रमुख मराठी गल्ली, शहराचा बालेकिल्ला म्हणून परिचित असलेल्या चव्हाट गल्ली मधून महाराष्ट्र एकीकरण समितीचे अधिकृत उमेदवार शुभम शेळके यांना जाहीर पाठिंबा व्यक्त करण्यात आला आहे. नुकत्याच चव्हाट गल्ली येथील जालगार मारुती मंदिरात झालेल्या बैठकीत हा निर्णय घेण्यात आला असून गल्लीच्या मुख्य फलकावर शुभम शेळके यांना जाहीर पाठिंबा असल्याचे जाहीर करण्यात आले आहे.
क्रांतीसिंह नाना पाटील युवक मंडळाच्या फलकावर मजकुर लिहीत जाहीर पाठिंबा व्यक्त करण्यात आला आहे.चव्हाट गल्ली ही बेळगाव शहरातील मुख्य गल्ली मानली जाते त्यामुळे या गल्लीत पाठिंबा मिळाल्यावर पूर्ण बेळगाव शहरातून पाठिंबा मिळतो असेही मानले जाते.
सीमाभागात गेल्या काही दिवसात मराठी भाषिकांविरोधात अनेक घटना घडत आहेत. वारंवार मराठी भाषिकांना डिवचण्यात येत आहे. शुभम शेळके यांनी वेळोवेळी अशा गोष्टींविरोधात आवाज उठवून प्रशासनाला जाब विचारला आहे.
सध्या महाराष्ट्र एकीकरण युवा समितीच्या माध्यमातून मराठी भाषिकांच्या बाजूने भक्कम लढा उभारण्यात येत आहे. या सर्व गोष्टींचा विचार करून युवकांना प्राधान्य आणि प्रोत्साहन देण्यासाठी चव्हाट गल्लीच्या वतीने शुभम शेळके यांना जाहीर पाठिंबा दिला आहे, अशी माहिती अमर येळ्ळूरकर यांनी ‘बेळगाव लाईव्ह’शी बोलताना दिली.
या बैठकीला दिगंबर पवार, बंडू कणबरकर, पप्पू बामणे, शुभम गौंडाडकर, हसबे ,सुधीर धामणेकर, जोतिबा धामणेकर, जयवंत काकतीकर, किसन रेडेकर, उत्तम नाकाडी आदींसह अनेक मान्यवर उपस्थित होते.
