शहरातील संगमेश्वरनगर येथे गेल्या एप्रिल महिन्यात सोन्याचे दागिने आणि रोख रकमेची चोरी करणाऱ्या उत्तर प्रदेशातील सिकंदरपुरच्या आरोपीला पोलिसांनी जेरबंद केले असून त्याच्याकडील 470 ग्रॅम वजनाच्या सोन्याच्या चेन आणि 60 हजारांची रोख रक्कम जप्त केली आहे.
पोलिसांनी अटक केलेल्या आरोपीचे नाव महंमदसल्तान नजीरअहमद अन्सारी (रा. सिकंदरपुर उत्तर प्रदेश) असे आहे. तो होनगा येथील केएनडीबी प्लाॅट येथे भाड्याच्या घरात राहत होता असे समजते. संगमेश्वरनगर येथे चोरी झालेल्या घरमालकाने दिलेल्या फिर्यादीवरून एपीएमसी पोलिसांनी तपास चक्रे फिरवून चोरी प्रकरणाचा छडा लावला. तसेच जेरबंद केलेल्या आरोपीकडून 23 लाख 15 हजार रुपये किंमतीच्या 470 ग्रॅम सोन्याच्या चेन आणि 60 हजार रुपयांची रोकड जप्त केली आहे.
एपीएमसी पोलीस ठाण्याचे इंस्पेक्टर दिलीपकुमार यांच्या नेतृत्वाखाली मंजुनाथ बजंत्री, बी. के. मीटरगार, दीपक सागर, शंकर कुगडोळी, नामदेव लमानी, केंपन्ना दोड्डमनी आदींचा उपरोक्त पोलीस कारवाईमध्ये सहभाग होता. सदर कारवाईबद्दल पोलीस आयुक्त डॉ. के. त्यागराजन यांनी वरील पोलिस पथकाची प्रशंसा करून त्यांना बक्षीस दिले आहे.
