रमेश जारकीहोळी सीडी प्रकरणातील संबंधित युवतीने दिलेल्या तक्रारीनुसार चौकशीसाठी हजार राहण्याची नोटीस रमेश जारकीहोळी यांना बजाविण्यात आली आहे.
रमेश जारकीहोळी यांच्याकडून या प्रकरणासंदर्भातील माहिती हवी असल्यामुळे शुक्रवारी सकाळी १० वाजता चौकशीसाठी सीसीबी तांत्रिक विभागाच्या विशेष कक्षात उपस्थित राहावे, अन्यथा त्यांच्यावर कायदेशीर कारवाईचे पाऊल उचलण्यात येईल, असे नोटीसमध्ये नमूद करण्यात आले आहे. दरम्यान रमेश जारकीहोळी यांची तब्येत बिघडल्यामुळे एसआयटी चौकशीला ते हजर राहू शकले नाहीत. यावेळी त्यांचे वकील शामसुंदर यांनी सदर माहिती दिली असून दोन दिवसांची वेळ मागून घेण्यात आली असल्याचे त्यांनी सांगितले. यानंतर पुन्हा सोमवारी चौकशीसाठी रमेश जारकीहोळी हजर राहणार आहेत, अशी माहिती वकील शामसुंदर यांनी दिली.
२ मार्च रोजी हे सर्व प्रकरण बाहेर आल्यानंतर रमेश जारकीहोळी सार्वजनिक ठिकाणी किंवा अन्यत्र कुठेही दिसून आले नाहीत. जनतेमध्ये याबद्दल प्रचंड चर्चा सुरु आहे. ३० मार्च रोजी कोल्हापूर येथील श्री अंबाबाई देवस्थानात दर्शनासाठी रमेश जारकीहोळी गेले होते. यादरम्यानचे फोटो आणि व्हिडीओ देखील समाजमाध्यमांवर प्रसारित झाले होते. मात्र सीडी प्रकरण बाहेर आल्यानंतर मध्यंतरी ते कोणत्याही कार्यक्रमात अथवा सार्वजनिक ठिकाणी दिसून आले नाहीत, हे विशेष. त्यांची एसआयटी पथकाच्या वतीने विशेष चौकशी करण्यात येत असल्याचीही माहिती उपलब्ध झाली आहे.
ज्याठिकाणी हे सीडी प्रकरण झाले आहे, त्या मल्लेश्वर येथील ग्रीन अपार्टमेंट या पीजीमधील खोल्यांची तपासणी देखील करण्यात आली आहे. रमेश जारकीहोळी यांच्या समवेत घालवलेल्या प्रत्येक क्षणाची कसून चौकशी करण्यात येत आहे. व्हिडीओ चित्रीकरण, खोलीतील कपडे, बेडशीट इतकेच नाही तर याठिकाणी आढळून आलेल्या केसांचेही नमुने तपासासाठी जमा करण्यात आल्याचे समजते. एसआयटी पथकाच्या चौकशीची आणि तपासाची गती पाहता लवकरच या प्रकरणाचा उलगडा होण्याची शक्यता आहे.
