केपीसीसी कार्याध्यक्ष सतीश जारकीहोळी यांना काँग्रेसने अधिकृत उमेदवारी जाहीर केली असून यासंदर्भातील अधिकृत आदेशपत्र आज प्रसिद्धीस देण्यात आले आहे. यानंतर बेळगावमध्ये सतीश जारकीहोळी यांनी पत्रकार परिषद आयोजित केली होती.
या पत्रकार परिषदेत आपण लोकसभा पोटनिवडणूक लढवून जिंकणारच असा निर्धार सतीश जारकीहोळी यांनी व्यक्त केला. येत्या सोमवारी आचारसंहिता आणि कोविड सरकारी मार्गसूचीनुसार जिल्हाधिकारी कार्यालयात अर्ज दाखल करण्यात येणार असल्याची माहिती त्यांनी पत्रकार परिषदेत दिली.
सोमवारी (दि. २९ मार्च) केपीसीसी अध्यक्ष डी.के. शिवकुमार, माजी मुख्यमंत्री सिद्धरामय्या आणि एस. आर. पाटील यांच्यासह राज्यातील नेत्यांच्या उपस्थितीत अधिकृत उमेदवारी अर्ज दाखल करण्यात येणार आहे.
अर्ज दाखल करण्यासाठी रविवारी सायंकाळी 6.30 वाजता केपीसीसी अध्यक्ष डीके शिवकुमार बेळगाव येथे दाखल होतील. अशी माहिती जारकीहोळींनी दिली. ते पुढे म्हणाले कि, हायकमांडने मला दिलेल्या उमेदवारीमुळे मला आनंद झाला आहे. २० वर्षांपूर्वी गमावलेल्या जागेवर पुन्हा हक्क सांगायची संधी मिळाली आहे. जनतेचा आशीर्वाद माझ्या पाठीशी राहावा, असे ते म्हणाले.
काँग्रेस पक्षाने नेहमीच जनतेच्या समस्यांचा विचार करून त्या सोडविण्याकडे भर दिला आहे. यापुढील काळातदेखील जनतेचे प्रश्न सोडविणे, त्यांच्या समस्यांचे निराकरण करणे, केंद्र सरकारने घेतलेले अपयशी निर्णय, महागाई, शेतकरीविरोधी कायदे या सर्वांवर तोडगा काढणे हा आमचा अजेंडा आहे. जनतेने आमच्यावर विश्वास ठेऊन आम्हाला विजयी करावे, असे आवाहन सतीश जारकीहोळींनी केले.