पॉलिसीधारकांची रक्कम परस्पर आपल्या खात्यात बेकायदेशीर रित्या जमा करून पॉलिसीधारकांची फसवणूक केल्याप्रकरणी संबंधित गुन्हेगाराला सीईएन पोलिसांनी अटक केली आहे. पीएनबी मेटलाईफ इंश्युरन्स या कंपनीत पॉलिसी भरणाऱ्या ग्राहकांची रक्कम घेऊन नकली कागदपत्रांच्या आधारे फसवणूक करणाऱ्या मधुकर विलास सपळे (वय ३१, रा. शास्त्री नगर, बेळगाव) याला पोलिसांनी अटक केली आहे. ग्राहकांकडून जवळपास २६ लाख रुपये फसवणुकीच्या जोरावर संबंधित आरोपीने जमा केले असून बेळगावमधील युनियन बँक, आयडीबीआय बँक आणि एसबीआय बँकेच्या खोट्या नोटिसीचा वापर देखील या आरोपीने केला आहे. तसेच खानापूरमधील बँक ऑफ महाराष्ट्र आणि हुक्केरी तालुक्यातील संकेश्वर येथील बँकांच्या बनावट नोटिसीचाही आधार घेऊन लॉकडाऊन काळात पोस्टाच्या आधारे या नोटिसी ग्राहकांना पाठविल्या आहेत. यासोबतच प्रतिष्ठित कायदे सल्लागारांच्या नावेही नोटिसी तयार करून पाठविण्यात आल्या आहेत. या सर्व प्रकारात नकली रबर स्टॅम्पचा वापर करून नकली नोटीस आणि कागदपत्रे तयार करून ग्राहकांची फसवणूक करण्यात आली आहे. सदर आरोपीकडून रबर स्टॅम्प बनविण्याचे मशीन, प्रिंटर, इनोव्हा कार, स्विफ्ट डिझायर कार जप्त करण्यात आली आहे.
सदर प्रकरणी पीएनबी मेटलाईफ इन्श्युरन्सची नकली कागदपत्रे आल्यासंदर्भात तक्रार दाखल करण्यात आली होती . या प्रकरणाची चौकशी आणि तपास करताना बेळगाव पोलीस आयुक्तालय व्याप्तीतील बेळगाव सीईन गुन्हे शाखेच्या पोलीस इन्स्पेक्टर बी. आर. गड्डेकर आणि त्यांच्या सहकाऱ्यांनी या प्रकरणाचा छडा लावला आहे. कायदे आणि सुव्यस्था विभाग पोलीस आयुक्त यांच्या मार्गदर्शनाखाली हि कारवाई करण्यात आली आहे.
या कारवाईत बेळगाव शहर सीईएन गुन्हे पोलीस विभाग इन्स्पेक्टर बी. आर. गड्डेकर आणि त्यांच्या सहकाऱ्यांनी सहभाग घेत कारवाई यशस्वीपणे पार पडली आहे. त्यांच्या या कामगिरीचे पोलीस विभागात कौतुक होत आहे.
