सीमाभागात करवेच्या म्होरक्यांनी धुडगूस घातला असून त्यांच्या मराठीद्वेषाची कावीळ उफाळून आली आहे. शुक्रवारी रामलिंगखिंड गल्ली येथील शिवसेनेच्या रुग्णवाहिकेवर कन्नड संघटनेच्या कार्यर्त्यांनी हल्ला केला.
पोलिस संरक्षण असूनही हा प्रकार घडल्यामुळे शिवसैनिकांसह संपूर्ण सीमाभागात संतप्त प्रतिक्रिया उमटत आहेत. शिवसेना कार्यालयासमोर असलेल्या रुग्णवाहिकेच्या नेमप्लेटची तोडफोड करण्यात आली असून वाहनाला काळे फासण्याचा प्रकार झाला आहे. पोलीस बंदोबस्तात झालेल्या या प्रकारानंतर संतप्त शिवसेना कार्यकर्ते आणि मराठी भाषिकांनी धर्मवीर संभाजी चौक येथे रास्ता रोको केला.
या सर्व प्रकारानंतर रामलिंग खिंड गल्ली येथील शिवसेना कार्यालयापासून धर्मवीर संभाजी चौकापर्यंत मोर्चा काढून घटनेचा निषेध करण्यात आला. त्यानंतर तब्बल एक तास रास्ता रोको करण्यात आला. तसेच ज्या कन्नड कार्यकर्त्यांनी हा प्रकार घडवून आणला आहे, त्यांच्यावर कारवाईची मागणी करण्यात आली. यावेळी डीसीपी विक्रम आमटेंनी मोर्चास्थळी भेट दिली. झालेला सर्व प्रकार शिवसेना कार्यकर्त्यांनी सांगितला.
संपूर्ण बाजू ऐकून ज्यांनी हे कृत्य केले आहे, त्यांच्यावर कारवाई करण्याचे आश्वासन डीसीपींनी दिले. यावेळी संबंधितांवर शिवसेनेच्यावतीने लेखी तक्रार देखील डीसीपींना देण्यात आली. हा प्रकार वेळीच रोखण्यात आला नाही, तर पुढील वेळेस शिवसेना आणि मराठी भाषिक शांत बसणार नाहीत, हा प्रकार खपवून घेणार नाहीत. जशास तसे उत्तर देण्यात येईल, असा इशारा शिवसेना कार्यकर्ते आणि मराठी भाषिकांच्यावतीने देण्यात आला.
या मोर्चात शिवसेना बेळगाव जिल्हा प्रमुख प्रकाश शिरोळकर, बंडू केरवाडकर, प्रवीण तेजम, महाराष्ट्र एकीकरण युवा समिती अध्यक्ष शुभम शेळके, शिवसेना पदाधिकारी आणि अनेक मराठी भाषिक सहभागी होते.
