रमेश जारकीहोळी सीडी प्रकरणातील युवतीचा आणखी एक व्हिडिओ शनिवारी (27 मार्च) सकाळी प्रसिद्ध झाला आहे. सदर तरुणीचा हा चौथा व्हिडीओ असून शुक्रवारी रमेश जारकीहोळींनी राज्यातील राजकारणात मोठी उलथापालथ होणार असल्याचे सांगितले होते.
राजकारणातील सर्वात मोठी बातमी बाहेर पडेल, आणि एका दिवसात सरकार पडेल, असे खळबळजनक वक्तव्य केले होते. यानंतर लगेच सदर सीडी प्रकरणातील युवतीने पुन्हा एक व्हिडीओ प्रसारित केला असून आत्महत्येचा इशारा देखील तिने दिला आहे.
सदर युवतीने आपला जीव धोक्यात असल्याचेही या व्हिडिओत म्हटले आहे. आपल्यासह आपले वकील आणि आपले कुटुंब धोक्यात असून वरिष्ठ नेत्यांशी चर्चा करण्याचेही व्हिडिओत नमूद करण्यात आले आहे. आपल्याबाबतीत ‘ती’ सीडी कुणी बाहेर आणली, कुणी प्रकाशित केली, हे मलाही माहित नाही. परंतु माझ्यावर अन्याय झाला आहे.
या अन्यायाला वाचा फोडण्यासाठी मी डी.के.शिवकुमार यांची मदत घेण्याचे ठरविले. नरेश अण्णांसोबत मी डीकेशींच्या घरी गेले. परंतु त्यांची भेट झाली नाही. यादरम्यान माझ्या कुटुंबीयांची अवस्था अत्यंत बिकट झाली आहे. आम्ही सर्वजण भीतीच्या छायेखाली आहोत.
माझे अपहरण झाले नाही. किंवा माझ्या कुटुंबियांचेही अपहरण झाले नाही. माझे कुटुंबीय कुठे आहेत, याची मला माहिती नाही. मी सुरक्षित ठिकाणी आहे. आणि माझे कुटुंबियदेखील सुरक्षित ठिकाणी आहेत. माझ्या कुटुंबियांना एसआयटी पथकाने बंगळूर येथे सुरक्षित ठिकाणी हलविण्याची सोय करावी, असे अपील युवतीने केले आहे. माझी मोठ्या प्रमाणात बदनामी झाली असून, मला न्याय मिळण्यासाठी मी लढा देत आहे, असे युवतीने व्हिडिओमध्ये म्हटले आहे.
शुक्रवारी रमेश जारकीहोळी यांनी पत्रकारांशी बोलताना म्हटले होते कि, ‘मी एका सरकारला सत्तेवरून खाली आणून दुसरे सरकार स्थापित केले. त्यापुढे हे काय आहे? मी अशा अनेक तक्रारींचा सामना करण्यासाठी तयार आहे’ सीडी प्रकारांतील संबंधित युवतीने तक्रार दाखल करून तिची चाल चालविली आहे. आता माझा गेम उद्या सुरु होईल. माझ्याकडेही वकील आहेत. मी प्रथम तक्रार दिली आहे. त्यामुळे त्याची प्रथम चौकशी करावी लागेल.
मी इथं माझ्या घरातच आहे. जर माझी चूक असेल, तर मी स्वतः पोलीस स्थानकात जाईन, असे रमेश जारकीहोळी यांनी स्पष्ट केले. एकंदर सीडी प्रकरणाला रोज वेगळे वळण मिळत असून तरुणीने केलेल्या तक्रारीनंतर सूत्रांनी दिलेल्या माहितीनुसार पोलिसांनी फआयआरमध्ये लैंगिक छळ, फसवणूक यासारख्या काही कलमांचा उल्लेख करण्यात आला असल्याचेही समजते.
