लुधियाना (पंजाब) येथे नुकत्याच आयोजित करण्यात आलेल्या 11 व्या कनिष्ठ राष्ट्रीय शरीरसौष्ठव स्पर्धेमध्ये बेळगावच्या केतकी मनोहर पाटील हिने “वुमन स्पोर्ट्स माॅडेल फिजिक” या विभागांमध्ये कांस्य पदक पटकाविले आहे.
पंजाब हौशी शरीरसौष्ठव संघटनेने सदर स्पर्धेचे आयोजन केले होते. वुमन स्पोर्ट्स माॅडेल फिजिक या विभागाच्या शरीरसौष्ठव स्पर्धेत महाराष्ट्राच्या रेणुका मुदलीयार हिने सुवर्णपदक तर राजस्थानच्या समृद्धी शाही हिने रौप्य पदक पटकाविले.
आसामच्या गौरिया खातून आणि जम्मू आणि काश्मीरच्या मोनिका गुप्ता यांना चौथ्या आणि पाचव्या क्रमांकावर समाधान मानावे लागले. सदर वुमन स्पोर्ट्स माॅडेल फिजिक शरीरसौष्ठव स्पर्धेत देशभरातील विविध ठिकाणच्या 14 महिला स्पर्धकांनी भाग घेतला होता.
या स्पर्धेत कर्नाटक राज्यतर्फे भाग घेणारे केतकी पाटील ही एकमेव शरीरसौष्ठवपटू होती. केतकी मनोहर पाटील हिने यापूर्वी महिलांच्या विविध शरीरसौष्ठव स्पर्धांमध्ये उल्लेखनीय यश मिळविले आहे.
गेल्यावर्षी रायचूर येथे झालेली राज्यस्तरीय स्पर्धा तिने जिंकली आहे. केतकी हिला प्रशिक्षक बेंजामिन जेराल्ड आणि चेन्नईचे राजेंद्र मनी यांचे मार्गदर्शन लाभत आहे. उपरोक्त यशाबद्दल केतकीचे राज्यातील शरीरसौष्ठव क्षेत्रात तसेच बेळगाव परिसरात अभिनंदन होत आहे.
