बेळगावमधील दक्षिणकाशी कशी म्हणून परिचित असलेल्या श्री क्षेत्र कपिलेश्वर देवस्थानात महाशिवरात्रीनिमित्त संपूर्ण मंदिर परिसर आकर्षक रित्या सजविण्यात आला आहे. कृष्ण पक्षातील त्रयोदशीयुक्त चतुर्दशीला साजरी होणारी महाशिवरात्री यावर्षी ११ मार्च रोजी संपूर्ण देशभर साजरी होणार आहे. हिंदू धर्मियांच्या सणांपैकी एक मानली जाणारी हि शिवरात्री साजरी करण्यासाठी बेळगावचे दक्षिणकाशी म्हणून परिचित असलेले श्री कपिलेश्वर देवस्थान सज्ज झाले आहे.
महाशिवरात्रीच्या निमित्ताने मंदिर आणि परिसरात आकर्षक विद्युत रोषणाई करण्यात आली असून संपूर्ण मंदिर आणि परिसरात फुलांची आणि इतर वस्तूंची सजावट करण्यात आली आहे. बुधवारी (दि. १०) रात्री १२ वाजता अभिषेक सुरु होणार असून पहाटे ४ पर्यंत अभिषेक घालण्यात येणार आहेत. गुरुवारी (दि. ११) सकाळी रुद्राभिषेक, सायंकाळी ८ वाजता महाआरती तर शुक्रवारी (दि. १२) महाप्रसादाचे आयोजन करण्यात आले आहे.
श्री क्षेत्र दक्षिण कशी कपिलेश्वर देवस्थानाचा कायापालट होत असून या मंदिरात यंदाच्या महाशिवरात्रीच्या भक्तांसाठी पर्वणी असणार आहे. कोरोना पार्श्वभूमीवर प्रशासनाने घालून दिलेल्या सर्व मार्गसूचीचे पालन करण्यात येणार असून खबरदारीसाठी गणेशमूर्ती विसर्जन तलावाजवळ घालण्यात आलेल्या ३०० फुटी मंडपापासून देवस्थानात भाविकांना रांगेतून दर्शन घेण्याची व्यवस्था करण्यात आली आहे. मंदिराच्या समोर ऑटोमॅटिक सॅनिटायझेशन मशीन बसविण्यात आले असून मंदिर परिसराचेही सॅनिटायझेशन करण्यात आले आहे.
प्रत्येक १ तासाला मंदिर सॅनिटाईझ करण्यात येणार आहे. त्याचप्रमाणे मास्क परिधान करणे हे प्रत्येकासाठी अनिवार्य आहे. रांगेत सोशल डिस्टंसिंग पाळण्यासाठी विशेष खबरदारी घेण्यात येणार आहे.
महाशिवरात्रीच्या औचित्याने मंदिरात विनायक पालेकर यांच्या सहकार्यातून विशेष आणि आकर्षक सजावट करण्यात आली आहे. देवस्थानात येताना प्रत्येक भाविकाने कोरोना खबरदारी बाळगावी, असे आवाहन ट्रस्टी अभिषेक चव्हाण आणि समस्त देवस्थान कमिटीच्या वतीने करण्यात आली आहे.
बेळगावच्या कपिलेश्वर मंदिरात महाशिवरात्री निमित्त विविध कार्यक्रमांचे आयोजन
