उद्यमबाग येथील एका इंजिनिअरिंग कॉलेजच्या एका विद्यार्थ्याने मानसिक त्रासाला कंटाळून गळफास लावून आत्महत्या केल्याचा प्रकार आज रविवारी सकाळी उघडकीस आला. यामुळे विद्यार्थीवर्गात एकच खळबळ उडाली आहे.
अजय खानापुरे (वय 20, रा. शिमोगा) असे आत्महत्या करणाऱ्या विद्यार्थ्याचे नांव आहे. अजय हा केएलई इंजीनियरिंग कॉलेजमध्ये केमिकल शाखेच्या तिसऱ्या सेमिस्टरचा विद्यार्थी होता.
कॉलेजमधील शैक्षणिक फी तसेच अन्य बाबींमुळे मानसिक त्रासातून त्याने आत्महत्या केल्याचे विद्यार्थी वर्गात बोलले जात आहे. कॉलेज नजीकच एका ठिकाणी पेइंग गेस्ट म्हणून राहणारा अजय कालपासून नाहीसा झाल्यामुळे त्याचे मित्र पोलिसात हरवल्याची तक्रार देण्याच्या तयारीत होते. तथापि आज सकाळी राहत्या ठिकाणी मागील बाजूस अजयचा गळफास लावलेल्या अवस्थेतील मृतदेह आढळून आला. त्याने बहुदा काल रात्रीच आत्महत्या केली होती. एका विद्यार्थ्याने गळफास लावून आत्महत्या केल्याची बातमी आज सकाळी कॉलेज परिसरात पसरताच घटनास्थळी विद्यार्थ्यांची एकच गर्दी झाली होती.
सदर घटनेची माहिती मिळताच उद्यमबाग पोलिसांनी तात्काळ घटनास्थळी धाव घेऊन पंचनामा केला तसेच मृतदेह उत्तरीय तपासणीसाठी सिव्हिल हॉस्पिटलकडे धाडला. पोलिसांनी अजयने मानसिक त्रासातून आत्महत्या केल्याचे सांगितले. याप्रकरणी उद्यमबाग पोलीस ठाण्यात गुन्हा नोंद झाला असून अधिक तपास सुरू आहे.
