बेळगाव महापालिकेसमोर लावलेल्या लाल-पिवळ्या ध्वजावरून शिवसेनेने छेडलेल्या आंदोलनानंतर शिनोळी -बाची सीमेवर गेल्या महिन्याभरापासून ठेवण्यात आलेला पोलिस बंदोबस्त अखेर दोन्ही राज्याच्या पोलिसांनी हटविला आहे. तणाव कमी झाल्यामुळे हा निर्णय घेण्यात आला असला तरी या ठिकाणची पोलीस गस्त कायम असणार आहे.
बेळगाव महानगरपालिकेसमोर कांही विघ्नसंतोषी कन्नड संघटनांनी लावलेल्या लाल-पिवळ्या ध्वजावरून शिवसेनेने आंदोलन छेडून कोनेवाडी (ता. बेळगाव) येथे भगवा ध्वज फडकविला होता. त्यानंतर निर्माण झालेल्या तणावामुळे बेळगाव आणि चंदगड तालुक्याच्या सीमेवर गेल्या महिन्याभरापासून पोलिस बंदोबस्त ठेवण्यात आला होता.
शिवसेना नेत्यांनी कोनेवाडी येथे भगवा ध्वज फडकविल्यानंतर करवे कार्यकर्त्यांनी महाराष्ट्रात घुसण्याची वल्गना केली होती. त्यामुळे महाराष्ट्र पोलिसांकडून शिनोळी येथे पोलिस बंदोबस्त तैनात करण्यात आला. होता. त्याचप्रमाणे कर्नाटक पोलिसांनी देखील बाची येथे बंदोबस्त ठेवला होता.
या ठिकाणी दोन्ही राज्यातून ये-जा करणाऱ्या वाहनांची विशेष करून प्रवासी वाहनांची तपासणी करून सोडण्यात येत होते. या पोलीस तपासणीमुळे दोन्ही राज्यातील प्रवासी त्रस्त झाले होते.
मात्र आता पोलिस बंदोबस्त हटविण्याचा निर्णय घेण्यात आल्यामुळे सर्वांना दिलासा मिळाला आहे. पोलीस बंदोबस्त हटविण्यात आला असला तरी या ठिकाणी पोलिस गस्त कायम असणार आहे. तसेच कोणतेही गैरप्रकार आढळून आल्यास कडक कारवाईचा इशाराही देण्यात आला आहे.
