शहरात हातोहात पळवल्या जात आहेत दुचाकी

बेळगाव शहर परिसरात लूटमार आणि चोरीच्या प्रकारांमध्ये दिवसेंदिवस वाढ होत आहे. याचाच एक नमुना बॉक्साइट रोड मार्गावरील आंबेडकरनगर येथे पहावयास मिळाला असून चोरटे कशा पद्धतीने दुचाकी लंपास करतात याचा पुरावा सीसीटीव्ही कॅमेरामध्ये कैद झाला आहे. गेल्या 1 फेब्रुवारी रोजी सदर घटना घडली असून पोलिसांना अद्याप चोरट्यांचा थांगपत्ता मिळालेला नाही.

सीसीटीव्ही कॅमेरामध्ये चोरट्यांनी लंपास केलेली हिरो कंपनीची एचएफ डिलक्स ही दुचाकी (क्र. केए 22 इटी 0174) कुलदीप लक्ष्मण राक्षे यांच्या मालकीची आहे. सदाशिवनगर येथे राहणारे कुलदीप राक्षे यांच्या मित्राचे एपीएमसी मार्केट यार्डकडे जाणाऱ्या बॉक्साईट रोडवर माऊली जनरल स्टोअर हे दुकान आहे.

कुलदीप राक्षे गेल्या 1 फेब्रुवारी रोजी सकाळी 7 वाजता माऊली जनरल स्टोअरच्या मालकासमवेत परगावी गेले होते. त्यानंतर गावी जाऊन परत आल्यानंतर आपली दुचाकी चोरीला गेल्याचे राक्षे यांच्या निदर्शनास आले माऊली जनरल स्टोअरच्या ठिकाणी सीसीटीव्ही कॅमेरे बसविण्यात आले असल्यामुळे शहानिशा केली असता दोघा दुचाकी चोरट्याने मोठ्या शिताफीने राक्षे यांची दुचाकी लंपास केल्याचे निदर्शनास आले आहे.

यासंदर्भात पोलिसात तक्रार नोंदवण्यात आली आली असली तरी आठवडा उलटला तरी चोरीला गेलेल्या दुचाकीच्या बाबतीत पोलिसांकडून कोणतीच सकारात्मक कारवाई झाली नसल्याने आश्चर्य व्यक्त होत आहे.

• सीसीटीव्ही कॅमेरे बसविले जात असले तरी पोलीस खात्याच्या डोळ्यात धूळफेक करून चोरटे आपले ईप्सित साध्य करत आहेत. वेगवेगळे मार्ग अवलंबण्याद्वारे चोरटे बेळगाव शहर परिसरात धुडगूस घालू लागले आहेत. तेव्हा वरिष्ठ पोलीस अधिकाऱ्यांनी याकडे गांभीर्याने लक्ष देण्याची गरज निर्माण झाली आहे.