कॅन्टोन्मेंट बोर्डाच्या लोकनियुक्त सभागृहाची मुदत गुरुवार दि. 11 फेब्रुवारी रोजी संपत असल्यामुळे बेळगाव कॅंटोनमेंट बोर्डावर आता प्रशासकीय राजवट लागू होणार आहे. संरक्षण खात्याने याबाबतची अधिसूचना जारी केली असून बेळगाव कन्टोनमेंट बोर्डवर प्रशासकीय अधिकारी म्हणून स्टेशन कमांड अधिकारी व मुख्य कार्यकारी अधिकाऱ्यांची नियुक्ती करण्यात आली आहे.
देशातील 56 कॅन्टोन्मेंट बोर्डवर प्रशासकीय अधिकाऱ्यांची नियुक्ती संरक्षण खात्याने केली आहे. कॅन्टोन्मेंट बोर्ड मध्ये 7 लोकनियुक्त सदस्य असतात. लष्करी अधिकारी आणि लोकनियुक्त सदस्यांच्या सभागृहाची मुदत 5 वर्षापर्यंत असते. बेळगाव कॅन्टोन्मेंट बोर्ड सभागृहाची मुदर मागील फेब्रुवारी महिन्यातच संपली होती.
त्यानंतर संरक्षण खात्याने दोन वेळा प्रत्येकी सहा महिन्याची मुदत वाढवून दिली होती. दोन वेळा मुदतवाढ मिळाल्यामुळे विद्यमान सदस्यांना 6 वर्षे काम करण्याची संधी मिळाली होती. मात्र दुसऱ्यांदा दिलेली मुदत वाढ आता 11 फेब्रुवारी रोजी संपुष्टात आली असून या दिवसापासून कॅन्टोन्मेंट बोर्डवर प्रशासकीय राजवट लागू होणार आहे.
आता बेळगाव कॅन्टोन्मेंट बोर्डाच्या कारभाराची धुरा स्टेशन कमांडंट ऑफिसर ब्रिगेडियर रोहित चौधरी व मुख्य कार्यकारी अधिकारी बर्चस्वा यांच्याकडे राहणार आहे. पुढील आदेश येईपर्यंत यांची नियुक्ती करण्यात आली आहे. कॅन्टोन्मेंट बोर्ड कायद्यात नव्या तरतुदी करण्यात येत असून कायद्यातील बदलामुळे निवडणुकीची घोषणा अद्याप करण्यात आलेली नाही.
कायद्यात बदल करून त्यानंतरच निवडणूक घेण्यात येणार असल्याची माहिती उपलब्ध झाली आहे. संरक्षण खात्याच्या नव्या धोरणानुसार कॅन्टोन्मेंट बोर्ड उपाध्यक्षांना ज्यादाचे अधिकार बहाल करण्यात येणार आहेत. त्याचप्रमाणे विविध समित्या स्थापन केल्या जाणार आहेत.
