दोघा लुटारूंनी दुकानात प्रवेश करून पैशाची मागणी करत गोळीबार केल्याने एक व्यापारी गंभीर जखमी झाल्याची घटना शुक्रवारी रात्री मठगल्ली येथे घडली. या घटनेमुळे व्यापारी वर्गात भितीचे वातावरण पसरले आहे.
गोळीबारात जखमी झालेल्या दुकानदाराचे नांव राकेश रूपचंद जैन (वय 45, रा. समाचार कॉम्प्लेक्स बेळगाव) असे आहे. त्याच्या डोक्याला गोळी चाटून गेल्यामुळे बारा टाके पडले आहेत. याबाबत समजलेली माहिती अशी की, राकेश जैन यांच्या मठगल्ली येथील चेतना स्टेशनरी मार्ट या दुकानाकडे काल शुक्रवारी 9:30 च्या सुमारास तिघे जण आले.
या तिघांपैकी एक जण दुकानाबाहेर थांबला तर उर्वरित दोघे जण दुकानात शिरले. मारवाडी भाषेत बोलणाऱ्या या दोघांपैकी एकाच्या तोंडावर मास्क होता तर दुसऱ्याच्या तोंडावर तो नव्हता. दुकानात शिरल्यानंतर त्यांनी जैन यांच्याकडे युनो पाकिटाची मागणी केली. जैन युनोचे पाकीट देत असतानाच दोघांपैकी एकाने झटकन दुकानाचे शटर खाली ओढले आणि दुसऱ्याने राकेश जैन यांच्यावर पिस्तूल रोखून पैशाची मागणी केली. तसेच हातातील पिस्तुलाचा एक बार उडविला. मात्र सुदैवाने पिस्तुलाची गोळी जैन यांच्या डोक्याला चाटून गेली.
या प्रकारामुळे कांही क्षण गोंधळलेल्या जैन यांनी लागलीच स्वतःला सावरले आणि प्रसंगावधान राखून साबणाचे एक पाकीट पैशाची मागणी करणाऱ्या लुटारूवर फेकून मारले. राकेश जैन यांनी आक्रमक पवित्रा घेताच भांबावलेल्या त्या दोघा लुटारूंनी शटर उघडून दुकानाबाहेर पलायन केले.
सदर घटनेत जखमी झालेल्या राकेश जैन यांना उपचारासाठी लागलीच इस्पितळात दाखल करण्यात आले. त्यांच्या डोक्याला झालेल्या जखमेला बारा टाके पडले आहेत. लूटमारीचा प्रयत्न करण्याच्या या घटनेमुळे मठगल्ली परिसरातील व्यापाऱ्यांमध्ये भितीचे वातावरण पसरले आहे. याप्रकरणी मार्केट पोलिस स्थानकात गुन्हा नोंद झाला असून पोलीस त्या अज्ञात लुटारूंचा शोध घेत आहेत
