बेळगांव रोलर स्केटिंग अकॅडमीचा स्केटिंगपटू अभिषेक नवले यांनी गेल्या 18 नोव्हेंबर 2020 रोजी 100 मी. जलदगती (स्पीड) स्केटिंगमध्ये 12.97 सेकंद इतका वेळ देऊन नवा विश्वविक्रम प्रस्थापित केल्याबद्दल त्याला नुकतेच गिनीज वर्ल्ड रेकॉर्ड प्रमाणपत्र प्रदान करण्यात आले.
ऑस्ट्रेलियाच्या डेव्हिड सॅलिसबरी या मुलाने यापूर्वी 100 मी. स्पीड स्केटिंगमध्ये 13.24 सेकंद वेळ नोंदवून विश्वविक्रम केला होता. हा विक्रम मोडीत काढताना अभिषेक नवले याने गेल्या 18 नोव्हेंबर रोजी 12.97 सेकंदाचा नवा जागतिक विक्रम प्रस्थापित केला. स्केटिंगमध्ये दोन वेळा विश्वविक्रम करून गिनीज वर्ल्ड रेकॉर्डमध्ये नांव नोंदवणारा अभिषेक नवले शिवबसवनगर येथील शेख कॉलेजमध्ये शिक्षण घेत आहे.
त्याचे वडील संजय नवले हे वायव्य कर्नाटक राज्य परिवहन मंडळाच्या बेळगांव चौथ्या आगाराचे चालक वजा वाहक आहेत, तर आई सुजाता नवले गृहिणी आहेत. या उभयतांचे अभिषेकला सतत प्रोत्साहन लाभत असते.
गेल्या 14 वर्षापासून स्केटिंगचा सराव करणाऱ्या अभिषेकने पोर्तुगाल येथील 10 व्या आंतरराष्ट्रीय स्पीड स्केटिंग स्पर्धेसह विविध राज्य व राष्ट्रीय स्केटिंग स्पर्धांमध्ये भाग घेऊन उल्लेखनीय यश मिळवले आहे. त्याचप्रमाणे बेंगलोर ते बेळगांव 540 कि.मी. स्केटिंग रॅली आणि आणि बेळगांव ते नवी दिल्ली 2 हजार कि.मी. स्केटिंग रॅली त्याने यशस्वीरीत्या पूर्ण केली आहे. त्याला बेळगाव जिल्हा रोलर स्केटिंग अकॅडमीचे अध्यक्ष उमेश कलघटगी यांचे प्रोत्साहन आणि प्रशिक्षक सूर्यकांत हिंडलगेकर यांचे मार्गदर्शन लाभत आहे.
अभिषेक नवले याला गिनीज वर्ल्ड रेकॉर्ड प्रमाणपत्र प्रदान करतेवेळी बेळगांव जिल्हा रोलर स्केटिंग अकॅडमी, रोटरी -कॉर्पोरेशन स्पोर्ट्स अकॅडमी, रोटरी क्लब ऑफ वेणूग्राम, केएसआरटीसी स्टाफ व कर्मचारी, जायंट्स ग्रुप ऑफ परिवार बेळगांव, युनियन जिमखाना तसेच एस. के. इंटरनॅशनल स्पोर्ट्स अँड कल्चरल ॲकॅडमीचे पदाधिकारी व सदस्यांसह विजयकुमार पाटील, प्रवीण हिरेमठ, विजया हिरेमठ, सायनेकर, सी. एस. बिडनाल, अनिता चंपन्नावर, अभिषेक जाधव, डाॅ. हलगी, योगेश कुलकर्णी, सूर्यकांत हिंडलगेकर आदी उपस्थित होते.
