सरिता पाटील यांनी घेतली शरद पवारांची तातडीची भेट-माजी महापौर सरिता पाटील यांनी माजी केंद्रीय मंत्री आणि राष्ट्रवादीचे अध्यक्ष शरद पवार यांची मुंबई मुक्कामी तातडीची भेट घेतली. या भेटीदरम्यान त्यांनी एमकेबी कोट्यांतर्गत सीमाभागातील अभियांत्रिकी तसेच वैद्यकीय शिक्षणासाठी देण्यात येणाऱ्या आरक्षित जागांविषयी चर्चा केली.
महाराष्ट्र शासनाच्यावतीने एमकेबी कोट्यांतर्गत अभियांत्रिकी आणि वैद्यकीय शिक्षण क्षेत्रात शिक्षण घेणाऱ्या विद्यार्थ्यांसाठी जागा देण्यात येतात. परंतु केवळ ८ जागाच आरक्षित ठेवल्यामुळे इतर मराठी भाषिक विद्यार्थ्यांना यामुळे अडचण निर्माण होत आहे.
गेल्या २५ वर्षांपूर्वी सीमाभागातील मराठी भाषिक विद्यार्थ्यांना एमकेबी कोट्यांतर्गत ८ जागा देण्यात येतात. तसेच या ८ जागांवरील विद्यार्थ्यांना मोफत प्रवेश देण्यात येतो. सीमाभागातील ८६५ खेडी आणि इतर परिसरातील वाढती लोकसंख्या लक्षात घेता केवळ ८ जागा या अत्यंत कमी प्रमाणात आहेत.
महाराष्ट्र शासनाच्या वतीने देण्यात येणाऱ्या या जागांमध्ये वाढ करावी, आणि कमीतकमी २० जागांचे आरक्षण देण्यात यावे, अशी मागणी शरद पवार यांच्याकडे करण्यात आली.
यावेळी या मागणीची दखल घेत यासंदर्भात मुख्यमंत्र्यांना पाठपुरावा देण्याचा तसेच सीमाभागातील मराठी विद्यार्थ्यांना जास्तीत जास्त या कोट्यांतर्गत जागा वाढवून देण्याचे आश्वासन दिले. माजी महापौर सरिता पाटील यांच्यासह महाराष्ट्र एकीकरण समितीचे अमित देसाई ,डॉ विराज पाटील आदी उपस्थित होते.
