बेळगांव जिल्हा प्रशासन आणि जिल्हा आरोग्य खात्याच्या अथक प्रयत्नांमुळे जिल्ह्यातील नव्याने आढळणाऱ्या कोरोनाग्रस्तांची संख्या कमी झाली असून आतापर्यंत 2,78,155 जणांचे निरीक्षण पूर्ण झाले असून सध्या जिल्ह्यात 279 सक्रिय रुग्ण आहेत.
बेळगांव जिल्हा आरोग्य आणि कुटुंब कल्याण खात्याच्या सर्व्हिलन्स युनिटने आज गुरुवारी प्रसिद्धीस दिलेल्या कोरोना वैद्यकीय पत्रकानुसार गुरुवार दि. 26 नोव्हेंबर 2020 रोजी सायंकाळी 7 वाजेपर्यंत कोरोनासंदर्भात बेळगांव जिल्ह्यात एकूण 2,78,155 व्यक्तींचे वैद्यकीय निरीक्षण करण्यात आले. जिल्ह्यात 14 दिवसांसाठी होम काॅरन्टाईन केलेल्या जिल्ह्यातील व्यक्तींची संख्या 31,223 झाली असून हॉस्पिटलमध्ये आयसोलेशन करण्यात आलेल्या व्यक्तींची संख्या 279 आहे. काॅरन्टाईन अर्थात विलगीकरणाचा 14 दिवसांचा कालावधी पूर्ण केलेल्या लोकांची संख्या 31,908 आहे, तर काॅरन्टाईनचा 28 दिवसांचा कालावधी पूर्ण केलेल्या व्यक्तींची संख्या 2,14,745 आहे. कोरोना विषाणू संसर्ग निदानासाठी एकूण 2,77,064 जणांचे स्वॅब नमुने घेण्यात आले होते. त्यापैकी 25,555 नमुन्यांचा वैद्यकीय अहवाल कोरोना पॉझिटिव्ह आला असून यामध्ये आज गुरुवारी नव्याने आढळलेल्या 31 जणांच्या अहवालांचा समावेश आहे.
प्रयोगशाळेत धाडलेल्या नमुन्यांपैकी 2,46,988 नमुने निगेटिव्ह असून जिल्ह्यात ॲक्टिव्ह केसीस 279 आहेत. त्याचप्रमाणे 2,975 नमुन्यांचा अहवाल प्रलंबित आहे. जिल्ह्यात 341 रुग्णांचा मृत्यू झाला असून 24,935 रुग्ण कोरोना विषाणूच्या संसर्गापासून मुक्त अर्थात पूर्णपणे बरे झाले असून त्यांना हॉस्पिटलमधून डिस्चार्ज देण्यात आला आहे. जिल्ह्यात आज गुरुवारी आढळलेल्या 31 कोरोनाग्रस्त रुग्णांमध्ये बेळगांव तालुक्यातील 18, गोकाक तालुक्यातील 4, अथणी व हुक्केरी तालुक्यातील प्रत्येकी 3, तर सौंदत्ती, चिक्कोडी व रामदुर्ग तालुक्यातील प्रत्येकी 1 रुग्णाचा समावेश आहे.
