आंतरराज्य दरोडेखोरांकडून ४० लाखांचे सोने जप्त

बेळगावच्या कॅम्प पोलिसांच्या वतीने आंतरराज्य दरोडेखोरांच्या टोळीला पकडण्यात यश आले असून त्यांच्याकडून २८ लाखांहून अधिक किमतीचे सोन्याचे दागिने तसेच एक चारचाकी वाहन जप्त करण्यात आले आहे.

गुगल मॅपच्या साहाय्याने शहराच्या उपनगरांमधील बंद घरांना लक्ष करून महाराष्ट्रातील दरोडेखोरांची ही टोळी घरात कुणी नसल्याची वेळ साधून डाव साधत होती. उपनगरांमध्ये बहुतांशी लोक हे नोकरदार वर्ग आहेत. त्यामुळे अशा घरांना या टोळीकडून टार्गेट केले जायचे.

या टोळीने सोन्याचे दागिने, रोख रक्कम आणि चारचाकी वाहनावर डल्ला मारला होता. त्यानंतर ही टोळी फरारी झाली होती. लक्ष्मी टेक येथील नक्षत्र कॉलनीतील डिसिल्वा यांच्या घरासह इतर तीन घरांवर दरोडा घालणारी ही खतरनाक टोळी कॅम्प पोलिसांच्या हाती लागली आहे.

सोमवारी सापळा रचून पोलिसांनी या आरोपींना अटक केली आहे. अटक करण्यात आलेल्या आरोपींमध्ये कोल्हापूर जिल्ह्यातील करवीर तालुक्यातील इस्पुरली गावातील प्रशांत काशिनाथ करोशी, आजरा तालुक्यातील धामणी गावातील अविनाश शिवाजी अडावकर यांचा समावेश आहे. या आरोपींकडून २८ लाख ८ हजार रुपयांचे सोने, ११ लाख ५० हजार रोख रुपये आणि मारुती सुझुकी बलिनो हे चारचाकी वाहन जप्त करण्यात आले आहे, अशी माहिती डीसीपी सी. आर. नीलगार यांनी दिली आहे.

आरोपींना न्यायालयीन कोठडीत ठेवण्यात आले असून पोलीस अधिक तपास करत आहेत. या कारवाईत कॅम्प पोलीस स्थानकाचे सीपीआय संतोषकुमार, एएसआय बी. आर. डोग यांच्यासह इतर कर्मचाऱ्यांचा सहभाग होता. कॅम्प पोलिसांनी केलेल्या या कारवाईचे पोलीस कमिशनर डॉ. के. त्यागराजन, डीसीपी सी. आर. नीलगार, एसीपी चंद्रप्पा यांनी कौतुक केले आहे.