ज्योती तुझं चुकलं..

सुळगा ची माहेरवाशीण, उचगावची सून आणि प्रेम करून तीनच महिन्यांपूर्वी विवाहबद्ध झालेल्या ज्योती निखिल चोपडे या अवघ्या १९ वर्षीय तरुणीची आत्महत्या चटका लावणारी आहे. किरकोळ कारणातून आपले जीवन संपवून घेतलेल्या ज्योतीने असे करायला नको होते. ज्योती तुझं चुकलं असंच या निमित्ताने प्रत्येकाच्या तोंडून ऐकायला मिळत आहे.

ज्योतीने आत्महत्या करण्याचे कारण काय याचा तपास पोलिसांनी केला असता एक क्षुल्लक कारण समोर आलंय. तिने आपले वडिलांकडे सोफासेट खरेदी करण्याचा हट्ट धरला होता. वडिलांनी कारणांमुळे ही मागणी पूर्ण केली नाही, पण आपण लवकरच सोफासेट घेऊ असे त्यानी ज्योतीला सांगितले होते.पण या कारणातून नाराज होऊन ज्योतीने थेट गळफास लावून घेतला अशी माहिती पुढे आली आहे.

ज्योती आणि उचगाव येथील निखिल चा प्रेम विवाह झाला होता. लग्न होऊन एक वर्षही पूर्ण झालेले नाही. इतक्या कमी काळात या संसाराला दृष्ट लागल्याचेच दिसत आहे. माहेरी गेलेल्या पत्नीच्या मृत्यूची बातमी ऐकून पतीला झालेले दुःख आणि आपल्या मुलीचा असा झालेला शेवट पाहून तिच्या वडिलांची व घरच्यांची परीस्थिती अवघड झाली आहे.

या घटनेने हळहळ व्यक्त होत असतानाच किरकोळ कारणासाठी आत्महत्या करण्याच्या कमकुवत मानसिकतेचा मुद्दाही चर्चेत आला आहे. ज्योतीने असे करायला नको होते, ज्योती तुझं चुकलंच अशी ही घटना ऐकणाऱ्या प्रत्येक व्यक्तीची प्रतिक्रिया आहे.

आजकाल किरकोळ कारणासाठी आपले जीवन संपवणाच्या घटना वाढत आहेत. आत्महत्येसारखा विचार मनात आला की त्याबद्दल इतरांशी चर्चा करून मार्ग काढला पाहिजे. अशावेळी इतरांनी मानसिक आधार देण्याची गरज आहे. मनस्थिती अस्थिर झाल्याचे जाणवल्यास इतरांनी लगेच ओळखून आत्महत्येसारख्या विचारातून परावृत्त करण्याची गरज असते, पण मनातले विचार बाहेर काढण्याची गरज असते याचा गांभीर्याने विचार व्हायला हवा.