1 नोव्हेंबर 1956 साली झालेल्या भाषावार प्रांतरचनेत बेळगाव सह सीमा भाग अन्यायी कर्नाटकात डांबण्यात आला त्या दिवशी पासून बेळगावात केंद्र सरकार विरोधात मूक सायकल फेरी काढून आंदोलन केले जाते.
या वर्षी कोविड मुळे या मूक सायकल फेरीला मर्यादा यायची शक्यता आहे अद्याप बेळगाव पोलिसांनी सायकल फेरीस परवानगी दिली नाही अश्या वेळी सीमा बांधवाना महा विकास आघाडी सरकारच्या मंत्रीमंडळाने काळ्या दिनाच्या आंदोलनास पाठिंबा देण्याचा निर्णय घेतला आहे.
गुरुवारी झालेल्या कॅबिनेट मंत्रिमंडळाच्या बैठक बेळगावातील मराठी भाषकांना पाठिंबा देण्याचा प्रस्ताव समनव्यक मंत्री छगन भुजबळ यांनी मांडला तर एकनाथ शिंदे यांनी त्याला अनुमोदन देत सर्वच मंत्र्यांनी मराठी भाषकांना पाठिंबा दिला आहे.
1 नोव्हेंबर रोजी महाराष्ट्राचे मंत्री देखील दंडाला काळी फित बांधून एक दिवस कामकाज करणार आहेत व सीमा भागातील मराठी जनतेच्या लोक लढ्यास पाठिंबा देणार आहेत.शिवसेनेचे जेष्ठ मंत्री एकनाथ शिंदे यांनी एक व्हीडिओ करून याबाबतची माहिती दिली आहे.
महाराष्ट्र एकीकरण युवा समितीच्या वतीने महाराष्ट्र शासनाच्या मंत्रीमंडळाला आणि महाराष्ट्रातील लोकप्रतिनिधींना काळा दिवस पाळावा यासाठी पत्रव्यवहार करण्यात आला होता त्याची दखल घेऊन आजच्या महाराष्ट्र मंत्रिमंडळाच्या बैठकीत काळा दिवस गांभीर्याने पाळून,त्या दिवशी मंत्रिमंडळ काळ्या फिती बांधून कामकाज करेल आणि सीमावासीयांना पाठिंबा देण्याचा ठराव मंजूर करण्यात आला. यासंबंधी महाराष्ट्र शासनाचे पत्र प्राप्त झाले आहे.
दोन्ही मंत्र्यांनी प्रसिद्धीस दिलेले पत्रक असे आहे.
सीमाभागातील मराठी भावांनो आणि बहिणींनो,
शासनाचे सीमाभाग – समन्वयक मंत्री म्हणून आपल्याशी संपर्क साधताना आनंद होत आहे. संयुक्त महाराष्ट्राच्या लढ्यात ‘बेळगाव, कारवार, निपाणी, बिदर, भालकी यांसह संयक्त महाराष्ट्र झालाच पाहिजे’, या घोषणेने महाराष्ट्र दणाणून सोडला. दुर्दैवाने मुंबईसह संयुक्त महाराष्ट्र मिळवताना सीमाभाग मात्र आपण मिळवू शकलो नाही. दाजीबा देसाईंच्या संपूर्ण महाराष्ट्र समितीपासून ते आताच्या काळा दिन आणि हुतात्मा दिनाला आंदोलन करणाऱ्या तरुण कार्यकर्त्यांपर्यंत सहा दशकांहून अधिक काळ सीमाभाग महाराष्ट्रात आणण्यासाठीचा लढा चालू आहे. साराबंदी आंदोलनापासून ते कन्नड सक्ती विरोधी आंदोलनापपर्यंत, आणि येळ्ळूरमधल्या ग्रामस्थांना झालेल्या अमानुष मारहाणीविरोधात उभ्या राहिलेल्या सनदशीर प्रतिकारापासून ते मराठी शाळा आणि मराठी संस्कृती यांच्या जतनासाठी उभ्या राहिलेल्या विधायक चळवळींपर्यंत, अनेक स्वरूपाची सामुदायिक ताकद सीमाभागाने पाहिली आहे.
आम्ही दोघेसुद्धा या सीमालढ्यातले छोटे शिपाई आहोत.आमच्याप्रमाणेच महाराष्ट्रातील राजकीय – सामाजिक जीवनातील अनेकांनी सीमालढ्याची धग कायम राहावी म्हणून प्रयत्न केले आहेत. सीमाभागातील लोकांचे बलिदान, त्याग आणि धाडस याचं खूप मोठं उपकारांचं ओझं महाराष्ट्राच्या मनावर आहे; शक्य त्या पद्धतीने त्याची परतफेड करण्याचा प्रयत्न महाराष्ट्र शासनाचे आणि महाराष्ट्राच्या राजकीय जीवनाचे प्रतिनिधी म्हणून आम्ही करत आहोत.
महाराष्ट्र शासनाने हा भाग महाराष्ट्रात यावा यासाठी सर्वोच्च न्यायालयात दावा दाखल केला आहे; हा दावा यशस्वी व्हावा यासाठी लागणाऱ्या सर्व प्रशासकीय आणि कायदेशीर बाबींची पूर्तता युद्ध पातळीवर करत आहोत; पण फक्त तेवढ्यावरच थांबून चालणार नाही. सीमाप्रश्न आणि सीमाभागातील लोकांच्या इतर प्रश्नांच्या सोडवणुकीसाठी यंदा रौप्यमहोत्सवी वर्ष साजरा करणारा सीमाकक्ष नव्या जोमाने प्रयत्न करत आहे. शालेय शिक्षण, उच्च शिक्षण, परिवहन, सामाजिक न्याय, गृह,मराठी भाषा आणि अन्य शासकीय विभागांशी समन्वय साधून सीमाभागातल्या ८६५ खेड्यांसाठी शासनाने आजवर घेतलेल्या निर्णयांचे एकत्रीकरण आणि सुसूत्रीकरण करण्यात येत आहे. जे प्रश्न अद्याप मार्गी लागलेले नाहीत, त्यासाठी विविध विभागांशी संपर्क साधून कोणते धोरणात्मक निर्णय घ्यावे लागतील, याचा वेगवान आढावा घेतला जात आहे. सीमाभागातील जनता महाराष्ट्राचीच आहे, असं महाराष्ट्र शासन मानतं; त्यामुळे महाराष्ट्रातल्या जनतेला उद्योग, रोजगार, शिक्षण आणि इतर बाबींमध्ये ज्या-ज्या सोयी, सवलती उपलब्ध करून दिल्या जातात,त्या सर्व सीमाभागातील जनतेलाही उपलब्ध करून देण्याचा आमचा प्रयत्न आहे.
जवळपास चार पिढ्या आपल्या भाषेच्या हक्काच्या राज्यात येण्यासाठी आपण सगळे निकराची लढाई लढत आहात. भाषावर प्रांतरचनेमुळे महाराष्ट्रावर जो अन्याय झाला, त्याच्या निराकरणासाठी सीमाभागातून महाराष्ट्र एकीकरण समिती आणि महाराष्ट्रातून संयुक्त महाराष्ट्र सीमा समिती यांनी दीर्घकाळ एकत्रितपणे काम केले आहे. अगदी अलीकडे राज्याच्या सुवर्णमहोत्सवी वर्षानंतर सीमाभागातून महाराष्ट्रात आलेले तरुण आणि महाराष्ट्राच्या विविध भागांतील सीमाप्रश्नांबद्दल आस्था असणारे लोक यांनी ‘संयुक्त महाराष्ट्राचा दुसरा लढा’ या नावाने सीमाभाग महाराष्ट्रात यावा आणि सीमाभागासह महाराष्ट्राचं मराठीपण उजळून निघावं, यासाठी आंदोलनात्मक आणि रचनात्मक कार्यक्रमही केले आहेत. महाराष्ट्रातील नव्या पिढीलाही या प्रश्नात रस आहे, ही गोष्ट आम्हांला दिलासादायक वाटते. तुरुंगवास सहन करणारे, पोलिसांच्या लाठ्या खाणारे, घर-कुटुंब यांची वाताहत झाली तरी त्याची फिकीर न बाळगणारे, राजकीय आणि आर्थिक कोंडी झाली तरीही धीर न सोडणारे, असे लाखो सीमा सत्याग्रही आहेत; म्हणूनच स्वतंत्र भारतातला हा अभूतपूर्व आणि एकमेवाद्वितीय लढा टिकून राहू शकला.
ज्येष्ठ नेते एन. डी. पाटील वयाच्या नव्वदीतही अतिशय निष्ठेने या चळवळीचे नेतृत्व करत आहेत. आमचे नेते माननीय शरद पवार साहेब यांनी विविध टप्प्यांवर सीमालढ्याचे नेते आणि कार्यकर्त्यांना धीराने साथ दिली आहे. राज्याचे मुख्यमंत्री माननीय उद्धवसाहेब ठाकरे यांनी बिदरपासून कारवारपर्यंत सीमालढ्यात योगदान देणाऱ्या ज्येष्ठ कार्यकर्त्यांबद्दल कृतज्ञता व्यक्त करण्यासाठी आणि तरुण कार्यकर्त्यांचे कौतुक करण्यासाठी, या सर्वांना मानपत्र देऊन २०१६ साली सत्कारही केला होता.
आज सीमाभागामध्ये मराठी शाळा, मराठी वाचनालये, मराठी नाटक, मराठी लोककला यासाठी काम करणाऱ्या अनेक संस्था आहेत; किंबहुना उर्वरित महाराष्ट्राने मराठी भाषा, समाज, संस्कृती याबद्दलचे टोकदार प्रेम काय असते, याचा धडा सीमाभागातील जनतेकडून घ्यावा असंही म्हणता येईल. या सर्व व्यक्ती आणि संस्था यांना महाराष्ट्र शासनाने या आधीही आर्थिक सहकार्य केले होते. आताही मराठी भाषा विभाग, शालेय शिक्षण विभाग, उच्च व तंत्र शिक्षण विभाग आणि सीमाकक्ष यांच्या एकत्रित प्रयत्नातून सीमाभागातील सांस्कृतिक संस्था आणि वाचनालये यांना मदत करण्याची प्रक्रिया चालू आहे.
सीमाभागातील सर्व जाती-धर्मांचा मराठी बोलणारा माणूस महाराष्ट्र आपला मानतो, त्यामुळे सीमाभागातील दलित, बहुजनांचे आणि अल्पसंख्याकांचे राजकीय, आर्थिक, सांस्कृतिक आणि सामाजिक सहभागाचे आणि प्रतिनिधित्वाचे प्रश्न आम्हांला अत्यंत महत्त्वाचे वाटतात. त्यासाठीची आवश्यक ती सर्व पावले उचलण्याची व उपलब्ध व्यवस्थेतील सर्व मर्यादा लक्षात घेऊन धोरणात्मक निर्णय घेण्याची शासनाची भूमिका आहे. या सर्व बाबतीतील तपशील आम्ही आपल्याला वेळोवेळी कळवत राहूच.
ज्या दिवशी हा भाग महाराष्ट्रात येईल, त्या दिवशी सीमाभागातील जनतेचेच नव्हे; तर महाराष्ट्रातील बारा कोटी जनतेचे स्वप्न पूर्ण होईल. या लढ्यात खारीचा वाटा उचलल्यामुळे आम्हांलाही तेव्हा कर्तव्यपूर्तीचे समाधान मिळेल. तो ऐतिहासिक क्षण येईपर्यंत आम्ही आपल्यासोबत आहोतच, असा ठाम विश्वास शासनाच्या वतीने आपल्याला देत आहोत.
धन्यवाद!
जय मराठी, जय महाराष्ट्र, जय भीम, जयहिंद.
आपले,
छगन भुजबळ
एकनाथ शिंदे
महाराष्ट्र मंत्रिमंडळाचा सीमा वासीयांच्या काळ्या दिनाला पाठिंबा-मंत्री काळी फित बांधून करणार निषेध-मंत्रिमंडळ बैठकीत सीमा वासीयांना पाठिंबा देण्याचा झाला निर्णय-सीमा समन्वयक मंत्री एकनाथ शिंदे यांचा व्हीडिओ
#maharashtrasupportblackday
#livebelgaum
#cabinetalsoobserve blackday
#supportbelgaumissue
https://www.facebook.com/375504746140458/posts/1245371752487082/
