कोरोना संदर्भातील मार्गदर्शक सूचीचे काटेकोर पालन करून आगामी दसरा उत्सव साध्या पद्धतीने साजरा करण्याची परवानगी देण्यास जिल्हाधिकारी तयार झाले आहेत. तेंव्हा सर्वांनी मास्क, सोशल डिस्टंसिंग आदी कोरोना संदर्भातील नियमांचे पालन करून यंदाचा दसरा उत्सव साध्या पद्धतीने साजरा करण्याचे आवाहन आमदार ॲड. अनिल बेनके यांनी केले आहे.
कोरोना महामारीच्या पार्श्वभूमीवर यंदाच्या दसरा उत्सवावर बंदी न घालता श्री गणेशोत्सवाप्रमाणे कोरोना संदर्भातील नियमांचे पालन करून साध्या पद्धतीने दसरा उत्सव साजरा करण्यास परवानगी दिली जावी या मागणीसाठी कॅम्प आणि कांगली गल्ली येथील दसरा उत्सव मंडळाच्यावतीने बेळगाव उत्तरचे आमदार ॲड. अनिल बेनके यांनी आज सकाळी जिल्हाधिकारी एम. जी. हिरेमठ यांची भेट घेतली. या भेटीनंतर प्रसारमाध्यमांशी बोलताना आमदार ॲड अनिल बेनके पुढे म्हणाले की, कर्नाटकात बेळगावमध्ये म्हैसूर नंतर सर्वात मोठ्या प्रमाणात दसरा उत्सव साजरा केला जातो. कोणताही जातीभेद, धर्म -भाषा भेद न करता बेळगांवातील समस्त नागरिक एकत्र येऊन हा उत्सव साजरा साजरा करतात. बेळगांवातील पालखी मिरवणूक त्याचप्रमाणे कॅन्टोन्मेंट अर्थात कॅम्प भागातील रथयात्रा ही दसरा उत्सवाचे मुख्य वैशिष्ट्ये आहेत. त्याच बरोबर शहरातील पाटीदार समाज, मारवाडी समाज आदी प्रत्येक समाजाचे लोक हा उत्सव उत्तम प्रकारे साजरा करतात.
यंदा कोरोना महामारीचे संकट असले तरी दसरा उत्सवाची परंपरा खंडित न करण्यासंदर्भात अलीकडेच कॅम्प येथील पांचही दसरा उत्सव मंडळाची बैठक झाली. माझ्या अध्यक्षतेखाली झालेल्या या बैठकीत जिल्हाधिकाऱ्यांच्या आदेशाचे पालन करून यंदाचा दसरा उत्सव साधेपणाने साजरा करण्याचा निर्णय घेण्यात आला. त्यानुसार आज आम्ही जिल्हाधिकाऱ्यांची भेट घेऊन त्यांच्याशी चर्चा केली, तेंव्हा कोरोना संदर्भातील मार्गदर्शक सूची आणि खबरदारीचा उपाय योजनांचे पालन करून साध्या पद्धतीने उत्सव साजरा करण्याची तयारी असल्यास आपण अवश्य परवानगी देऊ असे जिल्हाधिकाऱ्यांनी सांगितले आहे.
त्याचप्रमाणे परवानगीसाठी रीतसर अर्ज करण्यासही सांगितले असल्याचे आमदार ॲड. अनिल बेनके यांनी स्पष्ट केले. तेंव्हा आपण सर्वांनी मास्क, सोशल डिस्टंसिंग, सॅनीटायझर आदी सर्व खबरदारी घेऊन साधेपणाने यंदाचा दसरा उत्सव साजरा करुया असेही ते म्हणाले.
