बेळगाव जिल्हा सिमेंट डीलर असोसिएशनच्या वतीने आज जिल्हाधिकाऱ्यांना निवेदन सादर करण्यात आले. सिमेंट कंपन्यांनी अवाढव्य वाढ सिमेंटच्या दरात केली असून यामुळे ग्राहकांच्या खरेदीवर परिणाम होत आहे. सिमेंटच्या प्रत्येक पोत्यामागे ६० ते ८० रुपयांची दरवाढ करण्यात आली आहे.
लॉकडाऊनदरम्यान आणि लॉकडाऊन नंतर सातत्याने या दरात वाढ करण्यात येत असून ग्राहकांना लुटण्याचा प्रकार सिमेंट कंपन्या करत आहेत.
याच कंपन्यांनी लॉकडाऊनच्या कालावधीत कमी दरात सिमेंटची विक्री करण्यासाठी सूचना दिल्या होत्या. परंतु कंपनीतर्फे आधीच खरेदी केलेल्या दरापेक्षा याहून कमी दरात विक्री करणे शक्य नव्हते. त्यानंतर कंपनींकडून माल खरेदी करण्यासाठी मोठ्या भांडवलाची आवश्यकता असते.
परंतु सध्या लॉकडाऊन नंतर उद्भवलेल्या आर्थिक अडचणींमुळे कर्ज मिळणे मुश्किल झाले आहे. मागील सहा महिन्यात कर्जाची परतफेड योग्यरितीने करण्यात न आल्याने अनेक डीलर्स आर्थिक अडचणीत आले आहेत. याठिकाणी कामासाठी असलेल्या कामगारांनाही योग्यवेळेत वेतन देणे मुश्किल झाले आहे.
या सर्व गोष्टींचा विचार करून सर्व डिलर्सनी सिमेंट विक्रीचा व्यवसाय आणि यासंबंधी व्यवहार थांबविण्याचा निर्णय घेतला आहे. यासाठी या असोसिएशनच्या वतीने आज जिल्हाधिकाऱ्यांना निवेदन देण्यात आले. हे निवेदन सादर करताना अध्यक्ष इराण्णा दयान्नावर, सेक्रेटरी संजय बेळगावकर, खजिनदार भाऊसाहेब पुनाजी, यांच्यासह इतर पदाधिकारी आणि सिमेंट विक्रेते उपस्थित होते.
