मराठा समाज राजकारणात मागे पडत आहे. ही बाब लक्षात घेऊन बेळगाव ग्रामीण मतदारसंघात यापुढील विधानसभा निवडणुकीत मराठा कार्ड चालणार आहे. पक्ष आणि अस्मिता यामध्ये गल्लत न करता मराठा उमेदवार आमदार व्हावा या दृष्टीने काही महत्वाच्या पातळ्यांवर हालचाली सुरू झाल्या आहेत. काही करून मराठी भाषिकांची सत्ता आणण्याचा चंग बांधण्यात येत आहे. मराठा समाजातील व्यक्ती सत्तेवर यावा या दृष्टीने मोर्चे बांधणी सुरू करण्यात आली आहे.
कोरोनाचे संकट आले आणि समाजकारण व राजकारणाची दिशा बदलली. संपूर्ण कर्नाटकात जातीचे राजकारण चालते. गौडा, रेड्डी, लिंगायत आणि ब्राम्हण या जातीत कर्नाटकाचे राजकारण खेळते. आपल्या जातीचा उमेदवार आमदार झाला तर आपल्या माणसाला आपली दुःखे समजतात अशी एक भावना आहे. या भावनेतून बेळगाव ग्रामीण मधील बहु सांख्यिकी मराठा समाज आता आपला जातीचा उमेदवार मिळाला की त्याला आमदार करण्याच्या तयारीत आहे.
जो पक्ष मराठा उमेदवार देईल त्या पक्षाची बेळगाव ग्रामीण वर सत्ता येणार ही काळ्या दगडावरची रेष ठरणार आहे. पक्षांनी दिलेले इतर जातीचे आण्णा आप्पा भाऊ तसेच ताई माई आक्का कमी पडले की काय असे वातावरण तयार झाले असून हे वातावरण बदलण्याची तयारी सुरू आहे.
ज्या मतदारसंघात ज्या समाजाची मेजोरीटी त्या समाजाला प्रतिनिधित्व हे सूत्र असले पाहिजे. मराठी अस्मितेला आज हेच वाटत आहे. यातून समाज सुधारणा हे प्रथम उद्दिष्ट आहे. मराठा समाजाला नोकरी व्यवसाय आणि सरकारी संधी मिळाल्या पाहिजेत.
यासाठी सर्वप्रथम राजकीय वर्चस्व मिळाले पाहिजे. पण 2008 पासून इतर धर्म आणि जातीच्या उमेदवारांना हे साध्य करता आले नाही. मतदार आणि उमेदवार यात जात आडवी आली. पुन्हा पुन्हा हे होऊ नये म्हणून आता मराठा समाजातील काही लोक संघटित होत आहेत.
