रातोरात हटविण्यात आलेली मनगुत्ती गांवातील छ. शिवाजी महाराजांची मूर्ती लवकरात लवकर पुन्हा प्रतिष्ठापित केली जावी, अशी मागणी राष्ट्रवादी काँग्रेस पक्षाच्या बेळगाव जिल्हा शाखेने केली आहे.
राष्ट्रवादी काँग्रेस पक्षाचे बेळगाव जिल्हाप्रमुख राजू पाटील यांच्या नेतृत्वाखाली उपरोक्त मागणीचे निवेदन आज सोमवारी सकाळी जिल्हाधिकाऱ्यांना सादर करण्यात आले. जिल्हाधिकारी एम. जी. हिरेमठ यांनी निवेदनाचा स्वीकार करून योग्य ती कार्यवाही करण्याचे आश्वासन दिले.
दोन दिवसापूर्वी हुक्केरी तालुक्यातील मनगुत्ती येथील छ. शिवाजी महाराजांची मूर्ती हटविण्याचा जो प्रकार घडला त्याचा आम्ही निषेध करत आहोत. हे कृत्य करणाऱ्यांवर कठोर कारवाई केली जावी. तसेच हटविण्यात आलेली शिवरायांची मूर्ती निश्चित केलेल्या जागी तात्काळ बसविण्यात यावी, अशी मागणी निवेदनाद्वारे करण्यात आली आहे.
यावेळी बोलताना राष्ट्रवादीचे जिल्हाध्यक्ष राजू पाटील यांनी छत्रपती शिवाजी महाराज हे एका धर्माचे किंवा जातीचे नसून समस्त देशवासीयांचे आराध्यदैवत आहेत. असे असताना देखील कांही विघ्नसंतोषी लोकांनी त्यांची मूर्ती हटवण्याचा जो निंद्य प्रकार केला आहे त्याचा आम्ही निषेध करतो असे सांगितले. त्याचप्रमाणे सरकारला आमची विनंती आहे की आठवड्याभरात मनगुत्ती येथील शिवरायांची मूर्ती पुनश्च प्रतिष्ठापित केली जावी.
आज निवेदन सादर करतेवेळी सुरेंद्र अनगोळकर, पंकज जाधव, लतीफ पठाण, के. जी. पाटील, दुर्गेश मेत्री, अमोल देसाई आदींसह राष्ट्रवादीचे कार्यकर्ते उपस्थित होते.
