रघुनाथ पेठ अनगोळ येथील एका जुनाट धोकादायक विहिरीत पडलेल्या कुत्र्याला बेळगाव पशु कल्याण संघटनेच्या (बावा) कार्यकर्त्यांनी जीवदान दिल्याची घटना गुरुवारी रात्री घडली.
याबाबतची माहिती अशी की, रघुनाथ पेठ अनगोळ येथील जुन्या विहिरीमध्ये एक मोकाट कुत्रे पडले असल्याची माहिती स्थानिक रहिवाशांनी गुरुवारी रात्री 10च्या सुमारास बावा संघटनेला दिली. त्यानंतर पुन्हा थोड्यावेळाने संबंधितांने विहिरीतून कुत्र्याचा आवाज ऐकू येत नाही. त्यामुळे बहुतेक ते मेले असावे तेंव्हा तुम्ही येऊ नका असे फोन करून सांगितले. परंतु तरीही नेमके काय झाले आहे हे पाहण्यासाठी बावाचे कार्यकर्ते रात्री तात्काळ रघुनाथ पेठ येथील त्या विहिरीच्या ठिकाणी गेले. तेंव्हा खोल विहिरीत पडलेले ते कुत्रे जिवंत असल्याचे मात्र फक्त अर्धमेले झालेले असल्यामुळे भुंकत नसल्याचे बावा कार्यकर्त्यांच्या लक्षात आले.
त्या कुत्र्याला वाचविण्यासाठी बकेट घेऊन दोरीच्या साह्याने विहिरीत उतरण्याचा निर्णय घेण्यात आला. परंतु आसपासच्या लोकांनी विहीर अत्यंत जुनी असल्यामुळे सध्या पावसाच्या दिवसात ती आत कोसळण्याचा धोका असल्याचे सांगितले. तेंव्हा मदतीसाठी अग्निशामक दलाला फोन करण्यात आला. मात्र अग्निशामक दलाचे जवान येईपर्यंत बावा कार्यकर्त्यांनी निसरगाठ मारून तयार केलेल्या दोरीच्या फासाद्वारे त्या कुत्र्याला विहिरीतून सुखरूप बाहेर काढले होते.
या मदत कार्यात स्थानिक लोकांनीही त्यांना सहकार्य केले. कुत्र्याला बाहेर काढल्यानंतर बावाच्या कार्यकर्त्यांनी ती धोकादायक विहीर तात्पुरती बंद करून टाकली.
