जिल्ह्यातील अचानक वाढलेल्या कोरोनाग्रस्त रुग्णांच्या संख्येमुळे हादरलेल्या जिल्हा प्रशासनाने पोलीस खात्याला अत्यंत कठोर भूमिका घेण्यास सांगितले आहे. मात्र याची परिणीती गुरुवारी एका हृदयद्रावक निर्दय घटनेमध्ये झाल्याचे पहावयास मिळाले. जेंव्हा एका गरीब शेतकऱ्याचा भाजीपाला माणुसकी हरवलेल्या पोलिसांनी चक्क गटारात फेकून दिला.
याबाबतची माहिती अशी की, एक गरीब शेतकरी गुरुवारी आपल्या सायकलवरून वडगाव परिसरात रस्त्यावर फिरून भाजीपाला विकत होता. त्यावेळी त्याठिकाणी बंदोबस्त असलेल्या पोलिसांनी त्याला अडवून भाजी विक्री थांबून तात्काळ घरी परत जाण्यास सांगितले. तेव्हा पोटापाण्यासाठी मी भाजी विकत आहे असे सांगून त्या शेतकऱ्याने भाजी विक्री सुरु ठेवली. आपल्या सूचनेकडे दुर्लक्ष करून शेतकऱ्याने भाजी विक्री सुरूच ठेवल्याचे पाहून संतप्त झालेल्या पोलिसांनी त्याच्याकडून सर्व भाजीपाला हिसकावून घेऊन गटारात फेकून दिला.
याप्रसंगी भाजीपाला गटारात फेकू नये यासाठी संबंधित शेतकरी पोलिसांच्या हातापाया पडून विनंती करत होता. “मोठ्या कष्टाने मी हा भाजीपाला पिकवला आहे. वाटल्यास हा सर्व भाजीपाला तुम्ही घरी घेऊन जा, तुमच्या नातेवाईकांना द्या, परंतु गटारात फेकून नासाडी करू नका पोटापाण्यासाठी मी भाजी विकत आहे माझे नुकसान होत असेल तर होऊ दे. परंतु तो भाजीपाला दुसऱ्याच्या उपयोगी पडेल असे करा”, अशी कळकळीची विनंती तो शेतकरी करत होता. तथापि माणुसकी हरवलेल्या पोलिसांनी संतापून सर्व भाजीपाला चक्क गटारात फेकून दिला. पोलिसांच्या या कृत्याबद्दल वडगाव परिसरात तीव्र नापसंती व्यक्त होत असून गुरुवारी हा प्रकार सोशल मीडियावर चर्चेचा विषय बनला होता.
