बेळगाव येथील राजस्थानी समाजातील “मानव सेवा परम सेवा” असे मानणाऱ्या क्षत्रिय घाँची समाजातर्फे देशातील कोरोनाचा प्रादुर्भाव रोखण्यासाठी पंतप्रधान सहाय्यता निधीला तब्बल 6 लाख 64 हजार रुपयांची मदत देऊ करण्यात आली आहे.
बेळगाव येथील राजस्थानी समाजातील क्षत्रिय घाँची समाज हा तसा छोटा समाज आहे. तथापि हा समाज लहान असला तरी या समाजातील अनेक जण व्यापारी आहेत. सध्या देशातील कोरोना विषाणूचा प्रादुर्भाव रोखण्यासाठी मोठ्या प्रमाणात खर्च येणार असल्याने पंतप्रधान सहाय्यता निधीला मदत करण्याचे आवाहन करण्यात आले आहे. राजस्थानी क्षत्रिय घाँची लहान असला तरी दानपुंण्याच्या बाबतीत या समाजातील मंडळी आपला हात कधीच आखडता घेत नाहीत. त्यामुळे पंतप्रधान सहाय्यता निधीच्या बाबतीतील आवाहनाला प्रतिसाद देताना दिसायला लहान मात्र कर्तुत्वाने मोठ्या असलेल्या बेळगावातील राजस्थानी क्षत्रिय घाँची समाजातील अनेक दानशूर व्यक्ती पुढे येत आहेत.
या समाजातील भाटी इलेक्ट्रॉनिक्सचे मालक खंगराजजी रावतजी भाटी आणि सद्गुरू इलेक्टरीकल्सचे पुखराजजी बोराणा यांनी प्रत्येकी 2 लाख रुपयांची मदत पंतप्रधान सहाय्यता निधीला दिली आहे. त्याचप्रमाणे हनुमान स्वीटमार्टचे मालक कपुरचंद बोरांना यांनी 1 लाख 11 हजार रुपये तर शंकरलाल बोराणा, हिम्मतराम बोराणा आणि रुपाराम बोराणा यांनी प्रत्येकी 51 हजार रुपयांची मदत देऊ केली आहे.
उपरोक्त सर्वांनी आपल्या मदतीचा धनादेश खंगराजजी रावतजी भाटी व पुखराजजी बोराणा यांनी नुकताच केंद्रीय रेल्वे राज्य मंत्री व बेळगावचे खासदार सुरेश अंगडी यांच्याकडे सुपूर्द केला. याप्रसंगी कपुरचंद बोराणा, आमदार अॅड. अनिल बेनके, शंकरलाल बोराणा, हिंमतराम बोराणा, रुपाराम बोराणा आदी उपस्थित होते. पंतप्रधान सहाय्यता निधीला घसघशीत मदत करणाऱ्या भाटी व बोराणा कुटुंबीयांच्या दानशूर वृत्तीचे सर्वत्र कौतुक होत आहे.
