कोरोना विषाणूच्या वाढत्या प्रादुर्भावाचा पार्श्वभूमीवर राज्यातील सर्व सरकारी रुग्णालय अर्थात गव्हर्मेंट हॉस्पिटल्स आणि मेडिकल कॉलेज हॉस्पिटल्समध्ये बाहेरील अन्नपदार्थ आणि पेयं आणण्यास सक्त मनाई असल्याचा आदेश राज्याच्या आरोग्य आणि कुटुंब कल्याण आयुक्तालयाने एका लेखी पत्राद्वारे काढला आहे.
राज्यातील गव्हर्मेंट हॉस्पिटलमध्ये रुग्णांना चांगले आणि निरोगी अन्य पुरवले जात आहे. यासाठी हॉस्पिटल प्रशासनाला मदत करण्यासाठी डायेटीशियन अर्थात आहार तज्ञ नियुक्त करण्यात आले आहेत. तथापि अलीकडे गव्हर्मेंट हॉस्पिटलमध्ये बाहेरचे अन्नपदार्थ आणण्यास परवानगी दिली जात असल्याचे आढळून आले असून जे चुकीचे आहे. गव्हर्मेंट हॉस्पिटलसह तेथील वार्ड आदी परिसरात एका विशिष्ट हेतूने काही निर्बंध घातलेले असतात. तेंव्हा बाहेरील पदार्थ हॉस्पिटलमध्ये आणण्याची कृती रुग्णांच्या आरोग्याच्या दृष्टीने अस्वीकारार्ह आहे.
यासाठी हॉस्पिटल प्रशासनाने डायेटीशियन आणि एरिया फूड सेफ्टी ऑफिसरच्या देखरेखीखाली उत्तम दर्जाच्या किराणा सामान, डेअरी व बेकरी उत्पादने, भाजीपाला आणि फळांची खरेदी करावी. अन्नपदार्थ भाजीपाला ठेवण्याची खोली स्वच्छ व साफसूफ ठेवण्याबरोबरच ती उंदीर आणि कृमीकीटकांपासून मुक्त असावी. अन्नपदार्थ कोणत्याही परिस्थितीत जमिनीवर ठेवले जाऊ नये, यासाठी योग्य ती व्यवस्था केली जावी. यासाठी गरज पडल्यास सीआरसी फंड वापरावा. कायाकल्प तपशीलाप्रमाणे स्वयंपाक खोली आणि हात धुण्याची बेसिन स्वच्छ व साफसूफ ठेवावे. अन्नपदार्थ आणि भाजीपाला हाताळणाऱ्या कर्मचाऱ्यांच्या आरोग्य आणि स्वतः स्वच्छतेच्या बाबतीत हयगय खपवून घेतली जाऊ नये. त्यांची वैद्यकीय तपासणी तसेच स्वच्छतेबाबत समुपदेशन केले जावे.
हॉस्पिटलमधील कार्यक्षेत्रात दिवसा किंवा रात्री बाहेरील कोणतेही अन्नपदार्थ अथवा पेयं आणण्यास सक्त मनाई असेल. हॉस्पिटलमध्ये येऊन रुग्णांना थेट फळे, दूध आदी बाहेरील गोष्टींचे वाटप करणाऱ्या ख्यातनाम व्यक्ती आणि त्यांच्या समर्थकांसाठी देखील हा नियम न मोडता त्याचे काटेकोर पालन केले जावे. रुग्णांना फळे दूध आदींचे वाटप करण्यामागील उद्देश प्रशंसनीय असला तरी त्यामुळे हॉस्पिटलच्या वॉर्डमध्ये संसर्ग होऊन रुग्णांच्या आरोग्यास धोका निर्माण होऊ शकतो. यासाठी देणगीदारांना अशावेळी एआरएस फंडामध्ये निधी जमा करण्यास प्रवृत्त केले जावे, जेणेकरून हॉस्पिटलचा खरेदी विभाग देणगीदारांच्या इच्छेप्रमाणे साहित्य आणून वैद्यकीय सल्ल्यानुसार त्याचे रुग्णांमध्ये वाटप करेल. हॉस्पिटलमध्ये बाहेरील अन्नपदार्थ आणि पेयं आणली जाणार नाहीत याची खबरदारी घेण्याची जबाबदारी हॉस्पिटलच्या सुरक्षा व्यवस्थेवर टाकून त्याची तात्काळ अंमलबजावणी केली जावी. साथीच्या रोगांचा कायदा 1987 मधील तरतुदी आणि नियमानुसार उपरोक्त आवाहन करण्यात आले असल्याचे आरोग्य व कुटुंब कल्याण सेवा आयुक्तांनी लेखी पत्राद्वारे कळविले आहे. या पत्राची प्रत राज्यातील सर्व डिस्ट्रीक्ट हॉस्पिटल्स आणि मेडिकल कॉलेज हॉस्पिटल्सच्या सुप्रिटेंडन्सना पाठवण्यात आली आहे.
